Kryeministri Edi Rama ka mbledhur mbrëmjen e sotme në selinë e Partisë Socialiste deputetë të qarkut të Tiranës dhe shtabin elektoral të Ogerta Manastirliut.
Takimi nisi në orën 19:00, teksa arsyet e zhvillimit të kësaj mbledhje sipas gazetarit Enkel Xhangoli janë fokusuar mbi ecurinë e partisë pas vendimit të Gjykatës Kushtetuese.
Kujtojmë se togat e zeza lanë në detyrë kryetarin e Bashkisë së Tiranës, Erion Veliaj dhe anuluan zgjedhjet lokale në kryeqytet.
Ndërkohë, Partia Socialiste kishte vijuar fushatën me kandidaten e saj, Ogerta Manastirliun.
“Mbledhja ka filluar pak çaste më parë kur u fut edhe kryeministri Edi Rama. Të pranishëm janë deputetë të Qarkut të Tiranës, por edhe ekipi që u përcaktua nga PS për të qenë pjesë e fushatës për zonjën Manastirliu si kandidate për Bashkinë e Tiranës. Vendimi i Gjykatës Kushtetuese ndryshoi dinamikën dhe rrjedhjen e ngjarjeve sa i përket fatit të zgjedhjeve për Bashkinë e Tiranës dhe pikërisht mbledhja vjen fiks pas disa ditësh pasi gjykata vendosi të rikthejë në detyrë Erion Veliajn dhe rrjedhimisht për të mos patur zgjedhje, të paktën për momentin për Bashkinë e Tiranës. Mbledhja do ketë në fokus ecurinë që do të ketë PS, vendimet që do të marrë ajo në raport dhe me vendimin e gjykatës që tashmë është bërë publik”, raportoi gazetari Xhangoli.
Po sot, kryeministri Rama mblodhi kryetarin e Kuvendit, Niko Peleshi, dhe krerët e komisioneve parlamentare ku në fokus patën projektbuxhetin.
