Anëtarët e Partisë për Drejtësi, Integrim dhe Unitet (PDIU) në mbarë vendin po votojnë për kryetarin e partisë, drejtuesit e strukturave dhe delegatët e Kongresit që pritet të mbahet më 4 qershor.
Votimi nisi në orën 8:00 dhe do të mbyllet në orën 18:00. Dy kandidatët Shpëtim Idrizi dhe Halil Hyseni kanë votuar në selinë qëndrore të PDIU-së, të shoqëruar nga deputetët Mesila Doda, Aqif Rakipi e Tahir Muhedini.
Menjëherë pas votimit, Shpëtim Idrizi u shpreh se PDIU ka ambicje të mëdha për të dyfishuar mandatet. Ai theksoi se ky proçes tregon demokracinë e brendshme që ndihmon në arritjet e PDIU-së.
Duke komentuar procesin, kryetari Shpëtim Idrizi e ka cilësuar atë si një moment tepër të rëndësishëm.
“PDIU është në një moment të rëndësishëm të organizimit të saj të brendshëm dhe demokracisë së brendshme, do ta quaja. Ky është një moment i rëndësishëm sepse ne po krijojmë demokracinë e brendshme për herë të parë dhe në saj të ndarjes së re territoriale do krijojmë të gjithë infrastrukturën e re, sepse PDIU, me numrin e ri të anëtarësisë është një parti që ka ambicje të mëdha në garën e ardhshme elektorale, për t’i dyfishuar mandatet e saj”, ka deklaruar Idrizi.
Ndërsa kandidati tjetër për kryetar të PDIU-së, Halil Hyseni u shpreh se “Fakti që unë jam sot në garë, është shprehje e zgjerimit të PDIU-së dhe mundësive që PDIU ofron, jo vetëm për themeluesit e saj, por edhe për të ardhurit, siç jam edhe unë”.
Dera e PDIU-së është e hapur për cilindo, jo vetëm për t’u promovuar por edhe për të punuar në të gjitha nivelet e saj”, u shpreh Halil Hyseni.
Deputetja Mesila Doda tha se ky proces ka qenë një fytyrë tjetër e realitetit të politikës shqiptare.
“Besoj së është një shembull demokracie e brendshme në një parti, se si duhet të funksjonojë. Procesi është mjaft i rregullt dhe është hapur në të gjitha degët e PDIU-së, në të gjithë Shqipërinë. Një pjesmarrje masive, e cila tregon mbështetjen që po na japin anëtarët e rinj, por edhe anëtarët e vjetër, të cilët na kanë shoqëruuar përgjatë gjithë kohës. Besoj se është një shembull për t’u marrë, por edhe një fytyrë tjetër e relitetit të politikës shqiptare, e asaj që ka të bëjë me garën, me konkurrencën, jo me armiqësinë, jo me intrigën, jo me urrejtjen midis nesh. Besoj se surpriza e radhës në zgjedhjet e ardhshme do të jetë PDIU”-tha ajo.
Procesi i votimit ka nisur pa vonesa dhe do të ndiqet nga komisionet e ngritura, të cilat kanë 3 anëtarë. Menjëherë pas mbylljes së proçesit të votimit do të nisë numërimi i votave për të shpallur më pas, kryetarin e ri të PDIU-së dhe drejtuesit e rinj në çdo bashki. (atsh / r.a)