Sali Berisha i ka mbyllur çdo derë Lulzim Bashës për një bashkëpunim për zgjedhjet vendore, në Bashkinë e Kukësit.
Pyetur nga gazetari i A2 CNN, Anesti Bajramemaj, Berisha ka deklaruar se opozita e tij do të dalë me një kandidat që do të vijë si rezultat i primareve, por kurrsesi nuk do të bashkëpunojë me Lulzim Bashën që të dalin me një emër të përbashkët.
Për Berishën, të bashkëpunosh me Lulzim Bashës, ose “LulBravën” siç e quan ai, është njësoj si të bashkëpunosh me Taulant Ballën. Madje, zgjodhi që të hidhte edhe akuza, duke thënë se ajo që i bën bashkë Ballën dhe Bashën janë aferat korruptive të përbashkëta.
“Të bëjmë bashkëpunim me LulBravën, është njësoj si të bashkëpunosh me Taulant Ballën, meqë kanë edhe aferat e përbashkëta”, tha Berisha.
Nga ana tjetër, ai konfirmoi se në shtator do të ketë grupin e tij parlamentar, por nuk dha detaje se sa deputetë ka pas vetes apo kush do të jetë kryetari i saj.
Zgjedhjet në Kukës zhvillohen në 24 shtator, për shkak të largimit të Safet Gjicit pas video skandalit në zyrën e tij.
/f.stafa
