Lëvizja Vetëvendosje po shënon një avantazh të thellë në procesin e numërimit të votave të ardhura me postë, sipas rezultateve paraprake të publikuara nga Komisioni Qendror i Zgjedhjeve në Kosovë.
Të dhënat e deritanishme tregojnë se, pas numërimit të 80 kutive të votimit, Vetëvendosje ka siguruar 20.693 vota, ose 69.67 për qind të totalit të votave të numëruara.
Forca e dytë politike rezulton Lidhja Demokratike e Kosovës me 4.506 vota, që përfaqësojnë 15.17 për qind, ndërsa Partia Demokratike e Kosovës renditet e treta me 2.369 vota, ose 7.98 për qind.
Ndërkohë, Aleanca për Ardhmërinë e Kosovës ka marrë 1.585 vota, duke siguruar 5.34 për qind të votave të numëruara deri më tani.
Procesi i numërimit të votave me postë po vazhdon dhe pritet të sjellë një pasqyrë më të plotë të rezultatit zgjedhor. Rezultatet përfundimtare do të bëhen publike nga Komisioni Qendror i Zgjedhjeve pas përmbylljes së verifikimeve dhe numërimit të të gjitha votave.
