Komisioni Qendror i Zgjedhjeve (KQZ) ka bërë me dije se sot, më 2 janar, nis numërimi i fletëvotimeve nga diaspora, përkatësisht ato të tërhequra nga kutitë postare jashtë Kosovës. Numërimi do të zhvillohet në Qendrën e Numërimit dhe Rezultateve, dhe është një hap i rëndësishëm për përmbylljen e procesit zgjedhor.
Zëdhënësi i KQZ-së së Kosovës, Valmir Elezi, ka thënë për KosovaPress se këtë të premte do të fillojë numërimi i më shumë se 27 mijë fletëvotimeve, të cilat janë tërhequr deri tani nga kutitë postare në Berlin dhe Bernë.
“Nga votimi me postë, numri i shtetasve të regjistruar ka qenë rreth 58 mijë, por procesi i tërheqjes së fletëvotimeve ende nuk ka përfunduar. Tërheqjet e fundit do të bëhen më 2 dhe 5 janar 2026”, tha Elezi.
Sipas tij, deri tani, janë tërhequr më shumë se 28 mijë e 500 pako me fletëvotime, të cilat janë vlerësuar dhe verifikuar nga KQZ. Pas vlerësimit, janë miratuar 27,600 pako, ndërsa janë refuzuar 950 të tjera, për shkak të mungesës së dëftesës së regjistrimit të votuesit.
Po ashtu, nga votimi jashtë Kosovës, ku janë regjistruar 19,187 shtetas, kanë votuar 16,165 prej tyre, duke shënuar një pjesëmarrje prej 84.24%.
Sot, gjithashtu, ka rifilluar procesi i verifikimit të rezultateve të subjekteve politike nga formularët e plotësuar në vendvotime dhe numërimi i votave për kandidatët për deputetë në 11 komuna.
