Ndërsa Kosova përgatitet t’u drejtohet kutive të votimit më 28 dhjetor, analisti Ben Andoni ka zbërthyer strategjitë e partive politike dhe avantazhet e kësaj date të pazakontë. I ftuar në emisionin “3D” në RTSH të Alban Dudushit, Andoni theksoi se Lëvizja Vetëvendosje (LVV) hyn në garë e favorizuar, pikërisht për shkak të faktorit diasporë.
Sipas analistit, Kosova tashmë ka fituar një lloj imuniteti ndaj zgjedhjeve të parakohshme apo të jashtëzakonshme, dhe data e zgjedhur në prag të Vitit të Ri nuk përbën pengesë, përkundrazi.
Faktori “diasporë” dhe data 28 Dhjetor
Për Andonin, caktimi i zgjedhjeve në fund të dhjetorit është një lëvizje taktike që i shërben partisë së Albin Kurtit.
“Vetëvendosja favorizohet me këtë datë zgjedhjesh sepse vijnë edhe emigrantët,” u shpreh ai, duke nënkuptuar se fluksi i bashkatdhetarëve për festa përkthehet në vota për VV-në.
Transformimi i PDK-së dhe zbehja e narrativës së luftës
Një vëmendje të veçantë Andoni i kushtoi ndryshimit të strategjisë nga Partia Demokratike e Kosovës (PDK). Sipas tij, vendimi për të kandiduar Bedri Hamzën tregon një lexim të ri të realitetit politik, ku narrativa e UÇK-së nuk ka më peshën e dikurshme elektorale.
“Kosovës i është zbehur narrativa e UÇK-së, ndaj edhe PDK ka lëvizur. Bedri Hamza ka një qasje më të mirë shtetari dhe nuk do të vendosë vija të kuqe për koalicione,” analizoi Andoni.
Skenarët paszgjedhorë, mbyllja e epokës së “vijave të kuqe”
Ardhja e një lidershipi të ri në opozitë dhe qasja më e butë e Hamzës, sipas Andonit, mund të krijojnë hapësira bashkëpunimi që më parë dukeshin të pamundura. Ai parashikon se edhe vetë kryeministri Kurti do të ndryshojë fjalorin politik, duke shmangur denigrimin e opozitës.
“Arsyet për këtë zbutje janë pragmatiste. Nevojat ekonomike. Kosovës i duhen paratë e Evropës,” tha Andoni, duke theksuar se stabiliteti politik është kusht.
Sipas tij, zgjedhjet pritet të zgjidhin përfundimisht edhe ekuacionin e postit të Presidentit.
“Janë të gjitha në tavolinë për Vetëvendosjen,” përfundoi Andoni, duke lënë të hapur mundësinë për koalicione të gjera pas 28 dhjetorit.
