Në Kosovë po mbahen zgjedhjet parlamentare, ndërsa analisti Jeton Halimi komenton në Report Tv 4 vitet e qeverisjes së kryeministrit Albin Kurti, i cili kërkon një mandat të dytë. Halimi thotë se Kurti është penalizuar nga SHBA, pasi sipas tij me çështjet e veriut dhe dialogun Kosovë-Serbi ka bërë vetëm llogari politike.
Shuplakë të madhe jo vetëm për Kurtin, por edhe për Kosovën e quan deklaratën e emisarit të SHBA, Richard Gremell, i cili deklaroi se Kurti nuk është një partner i besueshëm për SHBA.
“Kurti është penalizuar nga amerikanët. Me çështjen e veriut ka bërë llogari politike dhe jo në bashkërendim me SHBA që është aleati ynë kryesor. Po të mos ishte SHBA, Kosova nuk do ishte sot shtet i pavarur.
Shuplaka e SHBA, të paktën nga një zyrtar i lartë i SHBA, është një shuplakë e madhe edhe për Kosovën, lërë për individin. Kurti nuk do dhe s’do të kërkojë falje që të zbusë pak gjakrat. Grenell e ka gjetur një metodë të mirë, është e dëmshme për Kurtin dhe Kosovën, për çdo qytetar që një fjalim i tillë nuk i bën lërë kryeministrit, por as shtetit të Kosovës”, tha Halimi.
Sa i takon ndikimit që mudn të ketë kjo deklaratë në zgjedhjet në Kosovë, Halimi thekson se kryeministri Kurti do të humbasë vota. Ai shprehet se qytetarët e dinë që Kosova është mike dhe aleate e SHBA.
Andi Kapxhiu: A do ndikojë në zgjedhje, mund të humbasë votat Kurti?
Jeton Halimi: Patjetër, çdo qytetar që ka logjikë të shëndoshë, e di që SHBA e duan Kosovën, e përkrahin. Politikanët shkojnë e vijnë, por shteti i Kosovës është i palëkundur. Kjo shuplakë është e rëndë edhe për Kurtin dhe votuesit e Kurtit, se e dinë që Kosova është gjithnjë krah për krah me aleaten e vet, SHBA. Do ketë rënie të votave ndaj Kurtit.
Kurti është kryeministri i parë që përfundon një mandat të plotë 4-vjeçar, por kjo për analistin Halimi nuk tregon asgjë pasi Kosova ka bërë vetëm regres.
“Fundi i mandatit nuk ka asnjë rëndësi, rëndësi ka sa të rinj ikin në BE për një jetë më të mirë. Ka një rënie të ekonomisë jemi në sanksione nga BE dhe çfarë mund të lëvdohet Kurti që ka përfunduar mandatin, ai mund të jetë edhe 10 vite të tjera, por nuk ka bërë asgjë. Ka regresion, me çfarë mund të mburret Kurti”, tha Halimi.
Analisti thotë se Kurti pritet të dalë forcë e parë nga këto zgjedhje, por sipas tij nuk do arrijë të formojë shumicën parlamentare dhe vështirësia do jetë nëse do arrijë një koalicion për të qeverisur.
