7 maji është afati i fundit kur partitë politike duhet ta njoftojnë KQZ-në për pjesëmarrje ose jo në zgjedhje. Gjithashtu, duhet të njoftojnë edhe për formimin e koalicioneve parazgjedhore.
Ky obligim vlen vetëm për 53 partitë politike që aktualisht janë pjesë e regjistrit të partive politike në Kosovë dhe nuk përfshin subjektet që synojnë të garojnë si nisma qytetare apo kandidatë të pavarur.
Më 5 maj nis aplikimi për akreditimin e vëzhguesve dhe mediave, ndërsa nga e mërkura do të fillojë regjistrimi i votuesve jashtë Kosovës.
“Pra, gjatë kësaj periudhe 12-ditore, shtetasit e Kosovës që jetojnë jashtë vendit mund të aplikojnë për t’u regjistruar si votues jashtë vendit, duke përzgjedhur të votojnë përmes postës ose në përfaqësi diplomatike. Para fillimit të kësaj periudhe, KQZ do të miratojë listën e Qendrave të Votimit në përfaqësi diplomatike.”
Në të njëjtën datë, më 6 maj, KQZ do të hapë platformën elektronike për të mundësuar ndërrimin e Qendrës së Votimit brenda komunës dhe për të mundësuar kundërshtimin e pasaktësive në listën votuese.
Kosova më 7 qershor mban zgjedhjet e reja parlamentare pasi deputetët nuk arritën të zgjedhin presidentin e ri të vendit sipas afateve kushtetuese.
