Zgjedhjet e ditës së djeshme në Francë kanë prodhuar një rezultat surprizë.
Sipas mediave të huaja, Fronti i Ri Popullor, aleanca e krahut të majtë që u formua për të penguar të djathtën ekstreme në raundin e dytë të zgjedhjeve legjislative franceze, fitoi numrin më të madh të vendeve në Asamblenë Kombëtare, të përbërë nga 577 deputetë në total.
Fronti i ri Popullor i krahut të majtë fitoi 182 vende, ndërsa aleanca qëndrore e Ansamblit të Presidentit Emmanuel Macron fitoi 163 vende.
Partia e ekstremit të djathtë e Marine Le Pen dhe aleatët e saj, të cilët morën një epërsi komanduese në raundin e parë, ranë në vendin e tretë për shkak të votimit taktik, duke fituar 143 vende.
Pavarësisht shmangies së një qeverie të ekstremit të djathtë, rezultati do të thotë se Franca është zhytur në një krizë politike, me asnjë parti që nuk arrin një shumicë absolute, duke e lënë Parlamentin të bllokuar, pasi të tre grupet nuk kanë traditë të punojnë së bashku.
Udhëheqësi kryesor i koalicionit të majtë, Jean-Luc Mélenchon, i kërkoi presidentit Macron të ftojë koalicionin e Frontit të Ri Popullor për të formuar qeverinë. Ai tha se aleanca “është gati të qeverisë”.
Kryeministri Gabriel Attal njoftoi se do t’i paraqesë dorëheqjen Emmanuel Macron sot. Sipas tij, Presidenti do të marrë funksionet e tij për aq kohë sa e kërkon detyra.
Në pamundësi për të thirrur zgjedhje të reja për të paktën edhe një vit, dhe me tre vjet të mbetur nga mandati i tij, Presidenti Emmanuel Macron duket i vendosur të kryesojë një Parlament të padisiplinuar, ndërsa problemet rriten brenda dhe jashtë vendit.
/a.r
