Mosregjistrimi i 7 partive të vogla nga ana e KQZ, në zgjedhjet që do të mbahen në Dibër më 11 shtator, shihet nga PD si një urdhër i drejtpërdrejtë i Ramës për të dëmtuar fitoren e opozitës në këtë bashki. Përmes një reagimi, zyra e shtypit e opozitës ka akuzuar Edi Ramën si përgjegjësin dhe porositësin e mosregjistrimit të 6 partive të bogla që sipas PD-së, ishin pjesë e koalicionit opozitar në vendoret e Dibrës.
“Nga paniku i ndëshkimit me votë në zgjedhjet e 11 shtatorit në Dibër, Edi Rama ka urdhëruar bllokimin e regjistrimit nga KQZ, të 6 partive aleate të Partisë Demokratike.
I braktisur, i mbetur vetëm me 3 aleatë, Edi Rama bën atë çfarë ka në dorë aktualisht, ndalon përmes KQZ-së regjistrimin e 6 subjekteve, çka do ta çonte në 18 numrin e partive të koalicionit opozitar.
Megjithëse preteksti për mosregjistrimin e subjekteve ra, pasi 6 partitë e përmbushën detyrimin, sërish KQZ me urdhër të Ramës i la jashtë aleatët e Partisë Demokratike. Ky vendim dëshmon ankthin e Ramës nga bashkimi i madh opozitar e popullor.
Urdhëri i Ramës do të apelohet në Kolegj Zgjedhor. Asgjë nuk e ndal fitoren e padiskutueshme të koalicionit të madh opozitar përballë klanit të ngushtë të korruptuar, kriminal e pervers të Edi Ramës.”- shkruhet në reagimin e zyrës së shtypit të PD.
Komisioni Qendror i Zgjedhjeve refuzoi të regjistronte 7 parti të vogla, sepse ato rezultonin debitore, duke mos kthyer në buxhetin e shtetit fondet e marra për fushatën e kaluar./java/a.k
