Zgjedhjet në Dibër, Blushi ironizon me të gjithë: Saliri, Iliri dhe Deliri

Deputeti Ben Blushi mbajti një fjalim sot në Parlament, ku shpjegoi sipas tij se përse në Dibër fitoi thellë PS­j-a.

Sipas Blushit, dibranët janë zhytur në varfëri ekstreme dhe ata nuk votuan të majtën për këtë, por qeverinë, kushdo që të ishte ajo.

Kjo sipas tij ka ardhur, pasi dibranët kishin frikë se mos humbnin edhe atë pak gjë që kanë. Ai madje i ktheu edhe përgjigje opozitës për pretendimet e saj për blerje votash.

Sipas tij, është e pamundur që të blihen 4 mijë vota. “Rama i bindi dibranët, se pa Dibrën nuk e bën dot Shqipërinë”, tha Blushi. “Partia Demokratike nuk është aspak e besueshme në atë që thotë. Ata kanë humbur dhe mua më shijon humbja e PD­së, më shumë se leximi i një romani. PD e meriton të humbë si grupim politik i pamotivuar dhe i pavotueshëm.

Ajo që më habit mua në rastin e Dibrës, është fitorja e pamerituar e qeverisë. Edhe vetë Rilindja që foli sot për Dibrën, e ka të vështirë të shpjegojë se çfarë ndodhi atje”, tha Blushi.

Më tej, Blushi tha se as qeveria nuk e di se për kë ka votuar populli i Dibrës, duke ironizuar reformat e qeverisë.

“Asnjë nuk e thotë që Dibra votoi takimin e Ramës me Mogherinin; reformën në drejtësi; rritjen e prodhimit në Myzeqe; ardhjen e shëndetshme të turistëve të huaj; rritjen e çmimit të naftës në dregun ndërkombëtar. Për çfarë votoi Dibra?! Sipas PD-së, janë blerë vota. Është e pamundur të blesh 4 mijë njerëz. Si ka mundësi pra që me këtë diferencë votash rilindja mundi tre kundërshtarë?! PD, LSI dhe ata njerëz që ankohen për cilësinë e qeverisjes? Çfarë magjie është kjo?”, tha Blushi.

“Të besosh që Dibra voton majtas, është njësoj si të votojnë grekët Merkelin. Dibranët nuk kanë votuar, as për të djathtët dhe as për të majtët. Dibranët kanë votuar qeverinë. Populli nuk do t’i dalë kundër qeverisë. Populli do që ta ketë mirë me qeverinë. Populli i Dibrës nuk votoi kundër qeverisë se ka frikë të humbasë edhe atë pak gjë që ka”, vijoi Blushi.

Më tej, Blushi tha se Dibra duhet të hyjë në një manual zgjedhor, i cili i ka rrënjet thellë në historinë tonë të demokracisë. Sipas tij, Dibra u shpik nga Saliri (Berisha), u transportua nga Iliri (Meta) dhe u kopjua nga Deliri (Rama). “Përdhunimi është më praktik se tradhtia. Tre yje shkëlqejnë sot në Dibër. Deliri, Saliri dhe Iliri, që do të vazhdojnë të shkëlqejnë ende për sa kohë shqiptarët janë në këtë galaksi. Dibra është manual zgjedhor, i shpikur nga Saliri, i transportuar nga Iliri dhe i kopjuar nga Deliri”, përmbylli Blushi.

Panorama/d.i.