Kreu i Partisë Mundësia, Agron Shehaj komentoi zgjedhjet në bashkinë e Tiranës. Ai u shpreh se opozita duhet të nxjerrë një kandidat jopartiak në mënyrë që të konkurrojë këdo kandidat që do të nxjerrë PS, si dhe të jetë i besueshëm.
“Kam thënë që ka shumë gjasa që të kemi zgjedhje të parakohshme në Tiranë, është çudi që ende nuk është shkarkuar (Veliaj). Kam propozuar duke thënë ‘duhet të nxjerrim një kandidat jopartiak që ka besueshmëri’. Vetëm kështu mund të fitojmë bashkinë e Tiranës.
Profili është dikush që i flet votuesve, një profil që mund të konkurroj këdo që do nxjerrë PS, Rama.”, u shpreh Shehaj në një intervistë për “Shqipëria Live” në Top Channel.
Sakaq foli për rinumërimin e votave në qarkun e Tiranës, ku tha se ka diferenca të vogla, por rezultati është thuajse i njëjtë.
“Ka diferenca të vogla. Rezultati është thuajse identik. Vendimet e KAS në fillim dukeshin në favor të PS dhe PD. Pavarësisht vendimeve që janë në favor të tyre, rezultatet nuk kanë ndryshuar.
Ajo që unë kuptoj është se cilat janë faktet që e bëjnë PD të besojnë që do i marrë mandatin Partisë Mundësia? Nga filmimet që ne kemi, qartësisht duket që rezultati, numërimi, korrespondon me çfarë është në video. Mbi çfarë baze hidhen pretendime për mandatin e dytë të Partisë Mundësia?”, shtoi Shehaj.
Po ashtu ai foli për rezultatin e 11 majit, ku tha se “Kishim pritshmëri më të larta, por sidoqoftë në krahasim me pritshmëritë që bëjnë kundërshtarët, mund të them se fillimi është i mirë. Të marrësh thuajse 10% në Tiranë, mendoj se është një fillim i mirë, por s’do të thotë se ia dolëm dhe tani nuk do të punojmë më.
Me dy mandate ne mund të bëjmë vetëm opozitë. S’kemi mundësi me dy vota që të ndikojmë mbi agjendën e parlamentit”.
Ndërsa në lidhje me kodin elektoral, ai tha se është për lista të hapura.
