Në zgjedhjet vendore të 21 qershorit ka kandidatë me të shkuar kriminale. Deklarata është bërë ditën e sotme nga ambasadori i Shteteve të Bashkuara të Amerikës në vendin tonë Donald Lu gjatë prezantimit të ndihmës amerikane për zgjedhjet vendore.
Në fjalën e tij, ambasadori Lu theksoi se SHBA-të kanë identifikuar disa kandidatë me histori të mundshme kriminale të cilët janë zgjedhur nga forcat politike për të garuar në zgjedhjet lokale të 21 qershorit.
Por krahas kësaj, ambasadori Lu tha se në mënyrë të përgjithshme SHBA ndihet mirë me listat e kandidatëve dhe veçanërisht me rritjen e numrit të grave. Lu nënvizoi edhe faktin se SHBA do t’i japë shqipërsië 500 mijë euro për mbarëvajtjen e zgjedhjeve vendore.
“Premtuam se do të shqyrtonim listat e kandidatëve për të kërkuar për emra personash që kanë qenë të arrestuar apo të dënuar për krime të rënda qoftë në Shqipëri apo në vende të tjera. Në përgjithësi ndihemi mirë për listat, nga prania e një numri të madh të grave. Kemi identifikuar disa emra me histori të mundshme kriminale dhe jemi duke i diskutuar rastet e tyre me përgjegjësi. Nxisim gazetarët, OJQ-të dhe qytetarët e thjeshtë të kërkojnë që politikanët të përmbushin kriteret dhe standardet”, u shpreh shefi i diplomacisë amerikane në vendin tonë.
Redaksia Online
(Javanews.al)
