Analisti Ben Andoni duke folur në edicionin e lajmeve në MCN TV mbi zgjedhjet e 14 majit tha se nuk pret që pjesëmarrja t’i kalojë 50 për qind. Sipas Andonit me këtë retorikë fushate pjesa gri do jetë shumë indiferente dhe e shtuar në numër, e pamobilizuar nga palët.
I pyetur se si e sheh pjesëmarrjen e votuesve në 14 maj, Andoni tha:
Do jetë ogur i mirë nëse shqiptarët do votojnë mbi 50 për qind. Kjo do ndodhte nëse opozita do arrinte të krijonte frymë. Më vjen keq të them që me sondazhet që bëhen duket që mazhoranca po ruan avantazhin. Besoj që publiku i lodhur nga një retorikë politike, por jo retorikë e pushtetit vendor, këto zgjedhje duhet t’ua kthenin qytetarëve, jo politikës, atëherë do besoja që do kishte pjesëmarrje. Por me këtë lloj retorike që është përdorur, ju e shikoni që Berisha dhe Rama harxhojnë kohën me Erdoganin, megjithëse në mendimin tim një mesazh për Erdoganit i takon nga gjithë politika shqiptare, sepse s’mund të mohohet që Turqia na është gjendur në momente të vështira. Nuk pres pjesëmarrje më shumë se 50 për qind të shqiptarëve. Me këtë fushatë këtë vit, mendoj që pjesa gri do jetë shumë indiferente, shtuar me masivitetin e publikut që është jashtë vendit dhe Kodi Zgjedhor s’e mundëson votimin e diasporës. Besoj që pjesa gri është shtuar sepse është pjesa më racionale e popullsisë që gjykon mbi faktin, jo mbi emocione. Berisha, Rama, Meta, Alibeaj, nuk besoj se kanë mundur të mobilizojnë këtë pjesë racionale. Besoj që ajo pjesë nuk gjendet e motivuar”.
Analisti thotë se opozita nuk ka një pozicion aq të mirë në këto zgjedhje dhe mund të marrë ndonjë bashki në Veri apo në periferi, jashtë vëmendjes. Ai vë në dukje se pritet një luftë në Shkodër, që do të jetë pika më interesante e zgjedhjeve.
I pyetur a është rritur opozita në mbështetje? Andoni shprehet:
Në disa vende po, sidomos në vende skajore ku duket që pushteti qendror s’ka arritur të lëvroje projekte të mëdha, megjithëse Rilindja Urbane, në dukje ka një qasje që e bën publikun pak të ndryshojë. Superioriteti i opozitës vazhdon të jetë në Veri të vendit, kjo për shkak edhe të skandaleve jo të pakta të socialistëve në Veri. Lufta më e madhe në zgjedhje do jetë në Shkodër, që më duket se do jetë pika më interesante në këto zgjedhje dhe pika e dytë besoj Durrësi për opozitën. M’u duk se z.Cara ka pasur një avantazh të mirë në momentet e para, kur ishte më i arsyeshëm dhe racional, por kur filloi me premtime kam përshtypjen se po i lë një lloj avantazhi kryebashkiakes që po rikandidon. Përveç zonave që janë në periferi, jashtë vëmendjes dhe disa bashkive në Veri, opozita s’ka një pozicion aq të mirë sa thuhet. Këto zgjedhje do na mësojmë që të vendosim një lloj site te shumësia e këtyre sondazheve. Tirana është e mbathur me probleme pa fund, por më duket se z.Këlliçi duhet të ishte më taktik për prezantimin e problematikave. Do duhej një logjikë e ftohtë. Nuk ka ndonjë arsyetim si do rregullohet shpërndarja e ujit në Tiranë. Ka goxha konfuzitet me pjesën e transportin urban. Një problem jashtëzakonisht i madh është ai i mjedisit, që duhet të zërë retorikën kryesore politike në vend, për shkak të ngrohjes globale. Mjafton të shkosh sipër në Dajt dhe e kupton gjendjen e Tiranës. Për këto nuk duket se ka zgjidhje, as kryebashkiaku aktual, që s’është transparent me pjesën e mjedisit, as kandidati tjetër i opozitës”.
I pyetur a mund të tolerojë mazhoranca disa bashki?, Andoni thotë:
Jo. Mazhoranca e ka kuptuar shumë mirë se çfarë do që të ndodhi të dy ata do të jenë në pushtet. Nuk ka ndonjë klauzolë që kryetari që humbet zgjedhjet duhet të largohet. Berisha e ka të vagullt retorikën kur pyetet për humbjen. Ramës i intereson kjo gjendje, kjo përçarje, s’besoj t’i tolerojë”.
Ai e konsideroi si të palejueshme retorikën e Ramës ndaj kandidatëve të opozitës, duke shtuar se ajo do t’i kthehet në bumerang në të ardhmen.
Kjo tregon nivelin politik në vendit tonë, ku zgjedhjet dhe kundërshtari konsiderohet si armik. Retorika e z.Rama është e palejueshme krejtësisht. Në partinë e vet, ngritja e kultit të Ramës ka bërë që atij t’i lejohet gjithçka. Kjo në të ardhmen do t’i kthehet në bumerang vet z.Rama. Retorika ndaj kandidatit të opozitës në Himarë është fare e papranueshme. Kjo tregon pjesën e munguar të demokracisë në PS. Më vjen keq që Rama më shumë mendon për kultin e vet, fitoren që ta ketë për CV-në e vet, sesa për publikun shqiptar”.
/s.f
