Ekonomia shqiptare po vijon të performojë në linjë me trendin e rajonit të Ballkanit Perëndimor, duke reflektuar një rritje të qëndrueshme, por nën presion nga zhvillimet globale. Sipas raportit më të fundit të Bankës Botërore, ekonomia shqiptare pritet të rritet me rreth 3.2 deri në 3.5 për qind gjatë vitit 2026, duke shënuar një ngadalësim të lehtë krahasuar me vitin 2025. Parashikimet janë rishikuar me ulje për gjithë Europën, si pasojë e zhvillimeve ndërkombëtare dhe dobësimit të kërkesës.
“Rritja ekonomike në rajonin e Europës dhe Azisë Qendrore pritet të dobësohet ndjeshëm në vitin 2026, si pasojë e pasigurive gjeopolitike dhe rritjes së çmimeve të energjisë. Kjo situatë pritet të ndikojë në investime dhe konsum, duke ulur ritmet e zgjerimit ekonomik në shumicën e vendeve të rajonit. Vendet importuese të energjisë do të përballen me presione të shtuara fiskale dhe në bilancin e pagesave”.
Në këtë kontekst, Shqipëria pritet të ruajë një ritëm mesatar rritjeje, ndërsa Serbia dhe Mali i Zi përballen me presione më të forta fiskale dhe inflacioniste. Mbështetja kryesore do të vijë nga eksportet e shërbimeve, veçanërisht turizmi dhe teknologjia e informacionit, si edhe nga investimet publike.
“Konsumi privat mbetet shtylla kryesore e rritjes ekonomike në rajon, megjithëse ritmi i tij është ngadalësuar. Investimet kanë qëndruar relativisht të forta, të mbështetura nga shpenzimet publike dhe kreditimi. Megjithatë, pasiguritë globale dhe tensionet tregtare mund të frenojnë eksportet dhe rritjen ekonomike”.
Në tërësi, Shqipëria mbetet në një pozicion relativisht të qëndrueshëm në raport me rajonin, por sfida kryesore mbetet rritja e produktivitetit dhe përballimi i goditjeve të jashtme.
