I kishin vlerësuar si zgjedhjet më të pazakonta dhe të tensionuara në Shqipëri, por një ditë pas votimit mediat ndërkombëtare e vënë theksin tek mungesa e dhunës.
BBC, rrjeti informative britanik shkruan se ”Shqiptarët kanë votuar si asnjë herë tjetër, pasi opozita i bojkotoi ato, ndërkohë që incidente të vogla ndodhën në disa qendra votimi”
Agjencia italiane e lajmeve, ANSA shkruante dje se “zgjedhjet në Shqipëri u zhvilluan në qetësi të plotë, pavarësisht thirrjes për bojkot nga ana e opozitës së qendrës së djathtë të drejtuar nga Lulzim Basha, i cili nuk merr pjesë pasi ka akuzuar mazhorancën socialiste për parregullsi të rënda gjatë zgjedhjeve të kaluara”.
Agjencia e njohur italiane e lajmeve, agenzinova.it. shkruan se ”Zgjedhjet lokale në Shqipëri u zhvilluan në qetësi të plotë dhe pa incidente serioze”.
”Shqipëria mënjanoi një konflikt të mundshëm të brendshëm që nga momenti kur lideri i opozitës së djathtë, Lulzim Basha, kërcënoi për bojkotimin e procesit zgjedhor dhe për moszhvillimin e tyre, por që përfundoi duke u kërkuar qytetarëve që të mos merrnin pjesë në zgjedhje”, thekson kjo agjenci.
Gazeta britanike ”Daily Mail” shkruan se ”Zgjedhjet për kryetarët e bashkive shqiptare, të bojkotuara nga partitë e opozitës u zhvilluan paqësisht… Përfaqësitë europiane dhe Shtetet e Bashkuara të Amerikës u bënë thirrje partive shqiptare, që të shmangin dhunën gjatë zgjedhjeve”.
Reuters shkruan se zgjedhjet lokale të bojkotuara nga opozita zhvillohen paqësisht dhe se votimi shkoi pa probleme, pasi vendet perëndimore paralajmëruan kundër akteve të dhunës.
Megjithatë, agjencia prestigjoze e lajmeve vijon duke thënë se pati nga ata që tallën votuesit me këngë dhe slogane nga partia komuniste.
Edhe “Euronews” e vë theksin tek zhvillimi paqësor i zgjedhjeve, pavarësisht bojkotit të opozitës.
“Nuk pati incidente të mëdha”, pohon “Euronews”, duke kujtuar se organizmat ndërkombëtar dhe Shtetet e Bashkuara bënë thirrje për shmangien e dhunën.
“Shqipëria shmang dhunën në zgjedhjet e kontestuara lokale”, shkruan “Balkan Insight”, e cila vëren se procesi i votimit shkoi më paqësisht nga ç’pritej.
“Fitorja pa rivalë e Ramës”, është titulli i “La Stampës”.
g.kosovari
