Presidenti i Republikës Ilir Meta nuk ka bërë asnjë ftesë zyrtare për konsultime me partitë politike për zgjedhjet e pjesshme vendore.
Pas takimit që zhvilloi me kryetarin e grupit parlamentar të PS, Taulant Balla, Meta doli në një deklaratë për mediat duke theksuar se kanë qenë vetë socialistët ata të cilët bënë një kërkesë informale për konsultim me Presidentin.
Kreu i shteitt u pyet nëse ka ndonjë shqetësim mbi gjendjen në PD dhe a ka informacion nëse kjo e fundit është gati për të marrë pjesë në zgjedhje. Por sikurse u shpreh Meta me ironi, shqetësimi i këtij të fundit ka qenë bojkotimi i mundshëm i zgjedhjeve të pjesshme nga ana e shumicës parlamentare.
“Nuk ka patur ftesë zyrtare për asnjë forcë politike. Në vijim të koherencës dhe qartësisë për të cilën flet edhe gjithë legjislacioni për zgjedhjet e imponuara për shkak të vakancave dhe për të zgjidhur këtë çështje, ju i dini iniciativat e mia si me KQZ, si me qeverinë, si me Kuvendin. Në të gjitha veprimet që kam ndërmarrë zyrtarisht kam komunikuar me këto institucione dhe njëkohësisht edhe Gjykatën Kushtetuese.
Në rast se unë do të kisha bërë ftesa për partitë kuptohet që do ishin drejtuar gjithë forcave politike nuk ka patur asnjë ftesë të tillë për PS sepse normalisht kjo do t’i bëhej o kryetarit të partisë ose do t’i bëhej sipas hierarkisë së Sekretarit të Përgjithshëm të partisë. Por ka patur kërkesë informale, për një konsultë me kryetarin e shumicës në Kuvend i cili është z.Balla meqënëse kemi patur disa dilema të interpretimit të ligjit lidhur me datën e mbajtjes së zgjedhjeve. Mora garanci nga z.Balla që ata janë të gatshmë për çdo zgjedhje dhe mirëkuptojnë edhe vendimin për datën. Kështu që nuk ka patur konsultim me partitë, ka patur konsultim me përfaqësuesit e shumicës në Kuvend.
Kam patur vetëm një shqetësim, mos kush e di i bojkotonte shumica”.
Sipas Presidentit Meta, në diskutim për zgjedhjet e pjesshme vendore në 6 bashki janë vetëm 2 data.
“Dy data janë, 27 Shkurti dhe 6 Marsi”.
/a.r
