Komisioneri Shtetëror i Zgjedhjeve, Ilirjan Celibashi, tha në një konferencë për mediat se KQZ-ja ka komunikuar me policinë për të verifikuar pretendimet kur dyshohet se rreth qendrave të votimit ka persona të paautorizuar.
Deklaratën ai e bëri pas denoncimit që bëri deputetja e Partisë Demokratike, Denisa Vata, sipas të cilës janë intimiduar zgjedhësit. Ai tha se lokalet që janë filmuar në Mat nuk kanë lidhje me ndonjë parti politike.
“Me përjashtim një apo dy rasteve nuk na rezulton të ketë pasur problematika të tjera në lidhje me këtë çështje. Nga informacionet që ka marrë KQZ, nuk kemi, të paktën për momentin raportime të tilla, pra për prani të personave të paautorizuar pranë ambienteve të qendrave të votimit. Ishte një diskutim për në Mat për disa lokale që janë hapur rreth e përqark. Ato janë bare që nuk kanë lidhje me ndonjë parti politike, nuk janë zyra të ndonjë partie politike. E kemi sqaruar këtë situatë edhe me përfaqësues politikë që e kanë ngritur këtë shqetësim. Nuk kemi marrë ndonjë shqetësim nga partitë politike në lidhje me këtë çështje apo edhe problematika të tjera”, tha Celibashi.
Ai komentoi edhe deklaratat e politikanëve që kanë thyer heshtjen zgjedhore.
“Nuk ka nevojë që besoj unë sidomos për kategorinë e politikanëve apo funksionarëve të ndryshëm publikë që në ditën e votimit apo edhe në periudhën e heshtjes zgjedhore e kanë të ndaluar që të bëjnë thirrje elektorale. Mund të bëjnë thirrje për të nxitur qytetarët të votojnë. Nuk do duhet ta bëjnë. Çfarë do duhet të bëjë KQZ do e shikojmë në çdo rast. Shpresoj që kjo thirrje e kësaj problematike të dëgjohet nga të gjithë”, tha Celibashi.
