Kabineti i ri qeveritar i shpallur ditën e sotme nga kryeministri, Edi Rama, solli ndryshime të rëndësishme, emra të rikonfirmuar në pozicionet e tyre, por dhe nga ata që vijnë për herë të parë.
Ajo që bëri “bujë” ishte hapja e rrugës për zhvillimin e zgjedhjeve të parakohshme në Bashkinë e Tiranës, kjo për shkak të arrestimit të Erion Veliajt. Rama, përgjatë fjalimit të tij në Asamblenë Kombëtare të Partisë Socialiste, propozoi Ogerta Manastirliun si kandidate, duke e hequr kështu nga përgjegjësia e të qenurit një ministre.
Por me kë mund të përballet Manastirliu në zgjedhjet e parakohshme nga kampi opozitar?
Deputetja e zgjedhur e Partisë Socialiste, Iris Luarasi, ishte në lidhje të drejtpërdrejtë në rubrikën “Përballë Lajmit” në Klan News, ku dhe foli për këtë çështje.
Luarasi u shpreh se Manastirliu i ka të gjitha shanset për të qenë një kryebashkiake, pavarësisht sfidave që e presin përpara në kohë fushate. Socialistja shtoi se nga opozita, nuk pret ndonjë surprizë.
Ajo cilësoi se nuk mund të thotë me siguri një emër të veçantë që do të vihet me siguri përballë Manastirliut, por u shpreh se beson që mund të kenë shanset figurat Ilir Alimehmeti dhe Belind Këlliçi nga PD-ja.
“Në qoftë se do të isha jashtë pjesës politike, do kisha thënë emra si zoti Alimehmeti, mund të ishte patjetër një kandidat i mirë përballë zonjës Manastirliu. Por, edhe ndoshta zoti Këlliçi”, tha ajo
Pavarësisht rezultatit të Këlliçit përballë Veliajt, Luarasi shprehet më “mbështetëse” ndaj figurës së Alimehmetit përballë Manastirliut, e kjo sepse ai nuk përfaqëson “politikën e vjetër”, e mund të mbrojë kauzat e opozitës më mirë. Po kështu, deputetja socialiste u bazua dhe mbi faktin se Alimehmeti mori një mbështetje të gjerë nga demokratët në zgjedhjet e 11 majit, pavarësisht se nuk mori dot votat e mjaftueshme për të qenë pjesë e Parlamentit të ri.
“Prandaj kur e përmenda nuk e thash zoti Këlliçin të parin, thash zoti Alimehmeti, i cili ka treguar se bëri një fushatë të mirë. Mblodhi një numër të konsiderueshëm votash për Parlament, pavarësisht se ai nuk hyri. Kështu që po të isha një mbështetëse e opozitës, do të doja të shikoja njerëz që nuk janë pjesë e politikës së vjetër, e në një farë mënyrë patjetër kanë një loj prezantimi dnjitoz për të prezantuar kauzat që ka opozita”, u shpreh socialistja.
Pasi Rama propozoi Manastirliun si kandidate për kryebashkiake të Tiranës, ai kërkoi nga Këshilli Bashkiak nisjen e procedurave për shkarkimin e kryetarit aktual, Erion Veliaj, i cili ndodhet në burg prej shkurtit të këtij viti.
Sjellim në vëmendje se përveç Tiranës, në zgjedhje do të shkojë edhe Vlora pas dorëheqjes së djeshme të Dredhës, Cërriku pas zgjedhjes së Ramës për ta bërë ministër Bujqësie kryebashkiakun e tij, si dhe Berati, Mati dhe Tepelena.
