Ministria e Brendshme ka nisur zyrtarisht procesin e përgatitjeve për zgjedhjet parlamentare të 11 Majit 2025.
Sot ministri Ervin Hoxha publikoi ekstraktin e parë të listës zgjedhore, siç përcaktohet edhe nga Kodi Zgjedhor.
Mbi 3.7 mln qytetarë me të drejtë vote
“Deri në këtë moment të papërfshirë në listë janë 4,536 shtetas, të cilët janë mbi 100 vjeç, që mbushin apo kanë mbushur këtë moshë deri në 11 Maj 2025. Për të siguruar të drejtën e votës, këta qytetarë duhet të paraqiten pranë zyrave të Gjendjes Civile, për t’u përfshirë në listën e zgjedhësve”, njoftoi ministri i Brendshëm, Ervin Hoxha në një deklaratë.
5050 numri i QV-ve
Aktualisht numri i përgjithshëm i qendrave të votimit brenda limiteve është 5,050.
“Duke përfituar nga ky komunikim, ftoj kryetarët e bashkive për tu angazhuar për vendimmarrje për qendrat e votimit që janë jashtë limiteve, me më shumë se 1 mijë zgjedhës apo më pak se 300 të tillë”, njoftoi Hoxha.
Ndërkohë Ministria e Brendshme dhe Ministria e Drejtësisë kanë miratuar një akt të përbashkët për pastrimin e listave nga shtetasit që ligji për dekriminalizimin i përjashton nga e drejta e votës si dhe hapjen e qendrave të votimit brenda burgjeve.
Dy kategori zgjedhësish për në 11 Maj
Kujtojmë se për herë të parë në historinë e zgjedhjeve parlamentare në vendin tonë, në listat zgjedhore do të përfshihen dy kategori zgjedhësish.
Në të parën futen zgjedhësit që jetojnë brenda vendit. Ndërkohë që në kategorinë tjetër janë zgjedhësit që jetojnë jashtë vendit.
Lista paraprake e atyre që duan të votojnë nga jashtë vendit do të jetë publike më 9 Mars 2025. Nga ai moment çdo qytetar do të ketë në dispozicion 48 orë për të shprehur përfundimisht vullnetin nëse duan të votojnë brenda apo jashtë Shqipërisë.
“Ky hap përfaqëson një moment historik për demokracinë shqiptare, duke ofruar mundësinë që diaspora të ushtrojë të drejtën e votës, pavarësisht ku jeton e punon”, njoftoi Hoxha.
Nga 11 Janari nis regjistrimi në PER
Ndërkohë nga 11 Janari 2025 shënohet fillimi i procesit të regjistrimit të votuesve jashtë vendit. Regjistrimi do të bëhet nëpërmjet Platformës Elektronike të Regjistrimit (PER) të votuesve nga jashtë, në të cilën mund të hyhet nga aplikacioni i KQZ.
Për regjistrimin nevojitet një pajisje elektronike për verifikimin nëpërmjet fotografimit të fytyrës për regjistrimin në PER dhe skanimin apo fotografimin e dokumentit të identifikimit dhe të dokumentit tjetër të deklarimit të adresës.
“Ndaj është shumë e domosdoshme dhe apeloj çdo shtetas shqiptar që jeton jashtë vendit, të rinovojë dokumentet e identifikim, duke patur të paktën njërin prej tyre të vlefshëm përgjatë këtij procesi”, tha Hoxha.
Prej disa javësh, është miratuar udhëzimi që lejon aplikimin qoftë edhe për një dokument identifikimi në zyrat tona konsullore.
“Ministria e Brendshme, në bashkëpunim me institucionet përkatëse, ka ndërmarrë të gjitha masat për të siguruar që ky proces të zhvillohet në mënyrë të drejtë, transparente dhe të aksesueshme për qytetarët tanë jashtë kufijve”, tha Hoxha.
“Çdo qytetar që has problematika apo paqartësi mund të kontaktojë në platformën e bashkëqeverisjes “Shqipëria që Duam””, tha ministri.
