Zgjedhjet e 11 majit dhe frika për krime dhe korrupsion zgjedhor, apo përdorim i shtetit në këto zgjedhje, ka bërë që Partia Demokratike t’i drejtohet sot kryeprokurorit Olsi Çela. Përfaqësuesit demokratë, deputeti Oerd Bylykbashi dhe drejtuesi politik për qarkun e Korçës, Ivi Kaso i kanë kërkuar kryeprokurorit hartojë një plan masash me qëllim ndaljen apo tkurrjen e këtyre krimeve. Në një deklaratë për mediat pas takimit, Bylykbashi theksoi se kjo prokurori mbulon gamën më të madhe të krimeve zgjedhore dhe duhet të veprojë tani në mënyrë konkrete dhe jo pas zgjedhjeve.
“Dominancën e çështjeve e mbulon kjo prokurori dhe me fokus përdorimin masiv të shtetit, shtet elektoral. Prokurori i përgjithshëm është ai që i ndjek këto çështje. Kërkuam që prokurori të ketë plan masash të qartë, tani, pa vonesë, që të kemi veprim efikas dhe të mos mbetet në aspektet deklarative aq më shumë pas zgjedhjeve. Kuadri ligjor i jep mundësi të mëdha sistemit të prokurorisë për të goditur paraprakisht krimin zgjedhor si atë të që po ndodh këtu dhe në diasporë. Dhe ajo që presim është të veprojë pa hezitim. Ka ikur koha e fjalëve, është koha e ndërhyrjeve të drejtpërdrejta nga prokuroria. Nëse do të ketë masa efektive shumë veta do të jenë të prirur të ndalen dhe mos kryejnë këto krime zgjedhore”.
Bylykbashi theksoi se ka marrë premtim për angazhim nga kryeprokurori Çela, por sipas tij njerëzit presin faktet. Ai tha se opozita do ta furnizojë prokurorinë me kallëzime penale konkrete dhe pret goditje pas tyre.
“Prokurori na ekspozoi vështirësitë që ka sistemi i prokurorisë në lidhje me ndjekjen efikase, por njerëzit duan rezultate. Na premtoi angazhim të dukshëm. Ne presim faktet dhe jemi të gatshëm ta furnizojmë prokurorinë me kallëzime penale konkrete dhe presim që pas tyre të ketë goditje efikase që ta rrudhë krimin zgjedhor. Ajo që do të ndodhë, nuk duhet të jetë ajo që ka ndodhur deri më sot”.
Një tjetër shqetësim që zyrtarët demokratë ndanë me prokurorin e Përgjithshëm është edhe përfshirja e policisë në zgjedhje, e cila sipas Bylykbashit duhet të goditet. Ndërsa Task forca e ngritur nga SPAK për krimet zgjedhore, për deputetin demokrat, është e vonuar.
“Asgjë që është thjesht letër nuk i bën punë askujt. Ne kërkojmë plan masash nga prokuroria ajo që bën SPAK-u është punë e tij. Ai ka refuzuar të merret me krimin zgjedhor, ndërkohë që është ndërtuar si mekanizëm për të goditur një nga aspektet më të rënda si shitblerja e votës. Letrat nuk i duhen askujt për sa kohë nuk ka efikasitet. Janë shumë vonë, më shumë se kërcëllima e dhëmbëve janë faktet. Sa persona dënohen për krimin e korrupsion zgjedhor që ka filluar këtu dhe në Diasporë? Por siç ia kërkojmë SPAK-ut, ia kërkojmë edhe prokurorisë dhe nëse ky sistem do të funksionojë me efikasitet të lartë edhe krimi zgjedhor do të rrudhet. Kjo nënkupton që prokuroria duhet të jetë mbi kokën e Policisë së Shtetit. Edhe policia është organ i politizuar e shndërruar e tëra piramida në funksion të zgjedhjeve edhe policia duhet të ndjeje goditje për shkak të shpërdorimit të detyrës, apo çdo përfshirje tjetër në vepra zgjedhore”.
