Ndonëse i izoluar në qelinë 5 të burgut “313” që prej tetorit Ilir Meta premton të jetë aktiv në fushatën elektorale të 11 majit. Formulën e ka gjetur: të shkruajë letra e t’ua dërgojë shokëve të tij që votojnë në listën e hapur të Tiranës ku Meta është kandidat nën siglën e koalicionit “PD-Aleanca për Shqipërinë Madhështore.
Përmes një audio-mesazhi nga burgu Ilir Meta foli në aktivitetin për prezantimin e kandidatëve të Partisë së Lirisë.
“Në kushtet e izolimit ekstrem, unë çdo ditë shkruaj dhe dërgoj 50 deri në 100 letra për shokët e mi, që nga shkolla fillore “Kongresi i Lushnjës”, 8–vjeçarja “Fan Noli”, gjimnazi “Sami Frashëri”, Fakulteti i Ekonomisë, shokëve që nga koha e sportit, për të kërkuar mbështetjen e tyre jo vetëm për Nr. 1, “PD–ASHM, por edhe për ILIR METAJ si deputet i Tiranës”, shprehet Ilir Meta.
Krahas ambicies për të dalë vetë më i votuari i listës së koalicionit, duke mposhtur brenda saj edhe kandidatët demokratë, Ilir Meta thotë se në Tiranë opozita duhet të marrë të paktën 20 mandate.
“Ai është kyçur në listën e mbyllur në Tiranë se ka shumë arsye t’i fshihet gjykimit të hapur të Tiranës. Ndërsa unë jam në listë të hapur dhe besoj te Tirana, e cila do të jetë lokomotiva e ndryshimit historik me të paktën 20 deputetë për aleancën tonë “PD–ASHM”, tha Meta.
Ilir Meta arriti të siguronte 4 deputetë në listat e mbyllura të koalicionit, nga të cilët 2 në Tiranë Tedi Blushin dhe Erisa Xhixhon, Edmond Haxhinaston në Elbasan e Brunilda Haxhiun në Fier, ndërsa një sërë kandidatësh të tjerë përfaqësojnë PL-në në listat e hapura.
Kjo forcë politike u trondit disa muaj më parë nga arrestimi i Metës me urdhër të SPAK për 3 vepra penale, korruspion, pastrim parash dhe fshehje pasurie.
