Kryetari i Komisionit Qendror i Zgjedhjeve, Ilirjan Celibashi, u shpreh se më 9 mars do të publikohen lista paraprake e zgjedhësve nga jashtë.
Ai theksoi se pas kësaj, do të ketë edhe një afat për të korrigjuar adresat nga data 9-12 mars, vetëm për ata që janë regjistruar.
“Janë 53 parti politike të regjistruara dhe tre koalicione. Deri tani ka paraqitur listën shumë emërore Lëvizja Bashkë, deri tani. Nga 9-12 mars, vetëm ata që janë të regjistruar, kanë të drejtë të kërkojnë të bëjnë ndryshime që lidhen me adresën dhe vetëm me adresën. Në datën 9 shpallim listën paraprake, që do të thotë se ti si institucion ike miratuar kërkesat dhe ata janë në listën paraprake të votuesve nga jashtë, për kategorinë e atyre që kanë marrë refuzim nga KQZ nuk mund të bëhet asgjë dhe kjo është e qartë si në KQZ dhe në rregullator. Ata që janë të regjistruar në listë, nëse shikon pasaktësi, kjo pasaktësi lidhet vetëm me adresën mund të paraqesin kërkesë në KQZ për t’i korrigjuar”, tha ai.
Ai shtoi më tej se të gjithë ata qytetarë, të cilëve u është refuzuar kërkesa për regjistrim nga KQZ kanë të drejtë të ankohen në Gjykatën e Rrethit Gjyqësor Tiranë, jo më vonë se 11 prilli.
“Të gjithë ata që u është refuzuar kërkesa nga KQZ mund të ankohen në Gjykatën e Rrethit Gjyqësor Tiranë jo më vonë se data 11 prill. Pra nga momenti që u është refuzuar kërkesa deri më 11 prill, mund të paraqesin një ankesë në Gjykatën e rrethit gjyqësor Tiranë, nëpërmjet një platforme online, që besoj me siguri Këshilli i Lartë Gjyqësor, i cili ka shprehur vullnetin për ta patur këtë platformë” shtoi ai.
I pyetur se kur mund t’u dërgohet fleta e votimit shqiptarëve që janë jashtë, Celibashi tha se është menduar koha mes 8-11 prill dhe shërbimi do jetë ekspres, pra me postë të shpejtë.
“Do të shohim si shkon procesi i regjistrimit e miratimit të listave shumëemërore. Nëse ky proces shkon normalisht ne midis fundit të javës së parë të prillit dhe javën e dytë të prillit do të dërgojmë fletët e votimit dhe dokumentacionin zgjedhor për votuesit nga jashtë. Pra synojmë që mes datës 8- 11 prill të përfundojmë procesin e dërgimit të fletëve të votimit nga jashtë. Në këtë mënyrë votuesit kanë kohë për të plotësuar dhe kthyer mbrapsht në KQZ. Deri në fund të javës tjetër do të kemi përfunduar procedurat që lidhen me operatorin e shërbimit postar. Do të përzgjedhim një prej operatorëve të njohur ndërkombëtarë e do të kërkojmë që dërgimi dhe kthimi i fletës së votimit të jetë ekspres dhe i gjurmueshëm.
