Kryetari i Partisë Demokratike Lulzim Basha ka zhvilluar një takim pune me Presidentin e Partisë Popullore Europiane, Joseph Daul dhe Eurodeputetin Eduard Kukan ku në fokus të bisedimeve ka qenë e ardhmja e Shqipërisë.
Në një postim në Facebook, Basha shprehet se: “Në një takim pune me Presidentin e Partisë Popullore Europiane Joseph Daul dhe Eurodeputetin Eduard Kukan në lidhje me zgjedhjet e ardhshme në Shqipëri diskutuam për nevojën jetike për demokracinë dhe aspiratat europiane të vendit që këto zgjedhje të jenë të lira dhe të ndershme”.
Më tej, Basha shton se “Presidenti Daul ripohoi se shumica europarlamentare është e qartë se zgjedhjet e lira dhe te ndershme, dekriminalizimi dhe lufta kundër krimit të organizuar dhe drogës janë kushte të patjetërsueshme për hapjen e negociatave me BE-në dhe Shqipëria duhet t’i përballë këto probleme në mënyrë urgjente dhe të drejtpërdrejtë”.
“Folëm gjithashtu për programin zgjedhor të Partisë Demokratike. Mora mbështetjen e tij për ndërmarrjen e një programi të thellë ndryshimi politik dhe ekonomik të vendit, me qëllim që Shqipëria të ndërpresë një herë e mirë ciklin e krizave dhe dështimeve politike dhe ekonomike dhe të përqafojë vlerat dhe qasjet europiane të mirëqeverisjes për qytetarët”, shkruan Basha ne faqen e tij ne Facebook./b.d
