Britanikët i janë drejtuar kutive të votimit këtë të enjte, më 7 maj, në zgjedhjet lokale që po shihen si testi më i rëndë për kryeministrin Keir Starmer që nga ardhja e tij në pushtet në korrik 2024.
Në Angli do të rinovohen më shumë se 5 mijë vende në 136 këshilla lokalë. Po ashtu votohet për gjashtë kryebashkiakë të zgjedhur drejtpërdrejt dhe për parlamentet e devolvuara në Skoci e Uells.
Qendrat e votimit u hapën në orën 07:00 dhe do të mbyllen në 22:00, ndërsa shumica e rezultateve priten deri të premten pasdite.
Partia Laburiste hyn në këto zgjedhje pas një rënieje të ndjeshme në sondazhe, pavarësisht shumicës së madhe parlamentare që siguroi në zgjedhjet e përgjithshme të vitit 2024.
Sondazhet parashikojnë një rritje të fortë të partisë Reform UK, së drejtuar nga Nigel Farage, e cila synon të kthehet në forcën kryesore opozitare ndaj Starmer. Edhe të Gjelbrit, nën drejtimin e ri të Zack Polanski, pritet të fitojnë terren.
Sipas modelimeve të YouGov, Partia Kombëtare Skoceze mund të marrë shumicë absolute në parlamentin e Holyrood, ndërsa në Uells, Plaid Cymru synon vendin e parë. Në këtë skenar, Laburistët mund të zbresin deri në vendin e tretë.
Votimi vjen në një moment delikat për Starmer. Në shkurt, ai i shpëtoi me vështirësi një përpjekjeje brenda partisë për ta larguar nga drejtimi, pas skandalit të lidhur me publikimin e dosjeve Epstein dhe marrëdhënien e Jeffrey Epstein me Peter Mandelson, ish-ambasador britanik në Uashington, i emëruar nga vetë Starmer.
Tensionet u thelluan edhe pas humbjes së Laburistëve në zgjedhjet e pjesshme në Gorton dhe Denton, ku kandidatja e të Gjelbërve, Hannah Spencer, doli fituese, ndërsa Labour përfundoi në vendin e tretë.
Në mars, sekretarja e përgjithshme e Unite, Sharon Graham, paralajmëroi se Labour mund të “shkatërrohet” në këto zgjedhje dhe kritikoi ashpër mënyrën si u menaxhua greva e punonjësve të pastrimit në Birmingham.
Një rezultat i dobët mund të rihapë debatin për lidershipin e Starmer, në një kohë kur qeveria e tij po përballet edhe me tensione ndërkombëtare, përfshirë përplasjet me administratën Trump për refuzimin e Britanisë për t’iu bashkuar ofensivës ushtarake kundër Iranit.
