Bllokada e krijuar pas mungesës së gatishmërisë për zgjedhjen e presidentit nga AAK-ja po konsiderohet si situata më e rëndë në Kosovë pas pavarësisë.
Shefi i Grupit Parlamentar, Besnik Tahiri, kritikoi Lëvizjen Vetëvendosje, e cila sipas tij, edhe me 51 për qind të votave, nuk po arrin që të bëjë shtetin funksional.
“Në një ndër krizat më të thella me shumë të panjohura, duke e sjellë shtetin përsëri në një rrethanë ku mbi një vit, vitin e dytë, është një eksperimentim në letër i betejave kushtetuese”, tha Besnik Tahiri, nga AAK.
Sipas tij, dekreti i presidentes Vjosa Osmani për shpërndarje të Kuvendit është kushtetues. Madje ai kritikoi, siç tha, sulmet ndaj institucionit më të lartë juridik në vend, Gjykatës Kushtetuese, nga eksponentë të LVV-së.
“Duhet të ndalet sulmi ndaj Gjykatës Kushtetuese, duhet të ndalet presioni”.
Ai e sheh të nevojshëm një bashkëpunim opozitar në zgjedhjet eventuale të ardhshme.
“Unë mendoj që çfarëdo bashkimi duhet të ndodhë karshi çdo pushteti, dhe duhet të mos ketë vetëm profil politik e majtë e i djathtë, por vizion shtetëror”.
Gjykata Kushtetuese aktualisht po shqyrton ankesën e Vetëvendosjes për dekretin e presidentes Vjosa Osmani për shpërndarje të Kuvendit, pasi kjo e fundit shpalli një dekret të tillë duke u thirrur në afatet kushtetuese, meqë deputetët nuk arritën të zgjedhin presidentin e ri deri më 5 mars.
