Këshilli i Lartë i Drejtësisë ka zgjedhur këtë të hënë kreun e ri të Gjykatës së Apelit Tiranë. Në krye të institucioni nga sot do të jetë Hysni Demiraj, i cili deri më sot ka mbajtur postin e gjyqtarit në këtë gjykatë.
Demiraj ishte në garë përballë Alaudin Malajt, i cili deri më sot ka mbajtur postin e kreut të Gjykatës së Apelit. Demiraj u zgjodh nga KLD, me 8 vota pro, ndërsa 2 anëtarë të tjerë votuan kundër tij.
Ashtu siç konfirmoi më herët Shqiptarja.com, në procesin e votimit nuk mori pjesë gjyqtari Gjin Gjoni i cili u tërhoq, pas kërkesës së një dite më parë të Alaudin Malajt për përjashtimin e tij nga votimi për shkak të konfliktit të interesit.
Gjoni nuk mori pjesë as në procesin e vlerësimit të punës së kreut të Apelit dhe ashtu siç pritej as në atë të votimit, duke dashur t’u shmanget debateve. Pak çaste para nisjes së votimit Demirajt nuk i mungoi këshilla e fundit nga kolegu dhe mbështetësi i tij Gjin Gjoni.
Report TV ka mësuar se në votimin për kreun e ri të gjykatës së Apelit ka munguar vota e ministrit të drejtësisë Ylli Manjai, Xhezahir Zaganjori, Vangjel Kosta ajo e presidentit Nishani si dhe vota e Gjin Gjonit.
Në këtë garë u përfshi dhe kandidati Gazmir Levanaj por pjesmarrja e tij u cilësua thjesht fiktive pasi votat e anëtarëve të KLD-s u ndanë midis Demirajt e Malaj.
Por cili është gjyqtari Demiraj?
Ai ka nisur karrierën në drejtësi me formim juridik në të ashtëquajturin Kursi i Plepave për të arritur pas dy dekadash në krye të apelit të Tiranës. Demiraj ka qenë relator në cështjen e gardistëve të akuzuar për vrasjet e 21 janarit dhe në këtë proces ndaj gardistëve u shua masa e sigurisë “arrest me burg”.
Po ashtu Demiraj ka qenë pjesë e gjykimit sëbashku me Gjin Gjonin dhe në masën e sigurisë të shtetasit turk të arrestuar për trafik ndërkombëtar droge, i cili u arratis pas heqjes së arrestit nga këta gjyqtarë.
