Partia Demokratike ka vendosur që të votojë pro zgjatjes së organeve të Vettingut. Vendimi është marrë pas mbledhjes së grupit parlamentar.
Mësohet se kryetari i PD-së, Lulzim Basha, u ka thënë deputetëve të tij, se selia blu është kontribuesja më e madhe e procesit të integrimit europian dhe kurrë nuk do të marrë ndonjë vendim kundër apo që e dëmton këtë proces. Megjithatë ai u shpreh se ndërhyrjet e mazhorancës për ta vënë në shërbim të vetes Reformën në Drejtësi e kanë dëmtuar dhe pasojat po i shohim sot.
“Zgjedhjet e lira dhe të ndershme janë prioriteti ynë. Ne duhet të bëjmë gjithçka, të konsultohemi me ekspertët më të mirë vendas dhe të huaj, në mënyrë që të ndërtojmë mekanizmat e duhur për të garantuar që vullneti i zgjedhësve të mos deformohet, si deri më sot, nga shitblerja e votës, bashkëpunimi me krimin dhe përdorimi administratës dhe fondeve publike. PD ka qenë që prej ditës së parë mbështetëse e Reformës në Drejtësi. Natyrisht ndërhyrjet e mazhorancës për ta vënë në shërbim të saj e kanë dëmtuar atë dhe pasojat po i shohim dhe sot. Pa një drejtësi të fortë, të pastër dhe të pavarur Shqipëria nuk do te këtë progres ekonomik dhe as në rrugën drejt integrimit. PD është kontribuesja më e madhe e procesit të integrimit europian, dhe kurrë nuk do të ndërmarrë ndonjë vendim kundër apo që e dëmton këtë proces. Reforma Zgjedhore, Reforma Territoriale dhe në Drejtësi që ndëshkon korrupsionin qeveritar dhe krimin e organizuar, janë prioritete kombetare dhe kontribuojnë në rrugën e Shqipërisë drejt BE”, tha Basha.
Siç ka mësuar gazetarja Klesiana Omeri, Partia Demokratike ka vendosur të votojë pro shtyrjes së afateve për organet e Vettingut duke marrë në këmbim plotësimin e dy kushteve kryesore të saj, kryerjen e Reformës Territoriale dhe kryerjen e Reformës Zgjedhore.
Pas votimit për zgjatjen e mandatit për organet e Vettingut, Parlamenti do të votojë për ngritjen e 2 komisioneve për zbatimin e menjëhershëm të kërkesave të PD. Këto dy çështje kanë hyrë në rendin e ditës së Kuvendit.
/a.r
