Presidenti amerikan Donald Trump ka njoftuar zgjatjen me 3 javë të armëpushimit Izrael-Liban. Në një postim në Truth Social, ai thotë se kjo vjen pas një takimi midis zyrtarëve izraelitë dhe libanezë në Zyrën Ovale në Shtëpinë e Bardhë.
“Shtetet e Bashkuara do të punojnë me Libanin për ta ndihmuar atë të mbrohet nga Hezbollahu”, deklaroi ai.
Ai thotë se ishte një nder i madh të ishte pjesëmarrës në këtë takim historik dhe njoftoi se presidenti libanez Joseph Aoun dhe kryeministri izraelit Benjamin Netanyahu do të vizitojnë Shtëpinë e Bardhë në javët e ardhshme, ndërsa SHBA-të kërkojnë të ndërmjetësojnë një marrëveshje paqeje më të qëndrueshme.
“Ata kanë Hezbollahun për të cilin duhet të mendojnë. Ne do të punojmë me Libanin për të rregulluar gjërat në atë vend. Mendoj se do të jetë një gjë e mrekullueshme që kjo të zgjidhet njëkohësisht me atë që po bëjmë në Iran”, deklaroi ai.
Presidenti Trump tha se nuk është nën presion për t’i dhënë fund luftës së tij me Iranin, megjithëse koha është e kufizuar për Teheranin .
“Unë kam gjithë kohën e botës, por Irani nuk e ka – Ora po mbaron!” shkroi Trump në mediat sociale.
Në komentet e mëvonshme për gazetarët në Zyrën Ovale, Trump thotë “nuk dua të nxitohem” kur bëhet fjalë për arritjen e një marrëveshjeje me Iranin.
“Mos më nxitoni”, tha ai kur u pyet se sa gjatë ishte i gatshëm të priste për një marrëveshje paqeje afatgjatë. “Dua të bëj marrëveshjen më të mirë… Dua ta kem atë të përjetshme.”
Ai përjashtoi përdorimin e armëve bërthamore, duke u thënë gazetarëve se ato ishin të panevojshme sepse SHBA-ja e kishte “shkatërruar” Iranin me armë konvencionale.
“Jo, nuk do ta përdorja. Një armë bërthamore nuk duhet të lejohet kurrë të përdoret nga askush”, tha Trump kur u pyet nga një gazetar në Shtëpinë e Bardhë.
Ndërkohë, SHBA ka shtuar praninë ushtarake në rajon, duke dislokuar një aeroplanmbajtëse të tretë. USS George H. W. Bush i është bashkuar USS Gerald R. Ford dhe USS Abraham Lincoln, duke rritur ndjeshëm fuqinë detare amerikane në Lindjen e Mesme.
Presidenti amerikan ka urdhëruar gjithashtu që çdo mjet iranian që vendos mina detare në Ngushticën e Hormuzit të “qëllohet dhe shkatërrohet”, ndërsa bllokada detare ndaj porteve iraniane vijon. Zyrtarët iranianë kanë deklaruar se bisedimet nuk do të rifillojnë pa u hequr kjo bllokadë.
