Kuvendi miratoi sot zgjatje me një muaj të afatit për Komisionin e Reformës Zgjedhore. Ky vendim u miratua me 76 vota pro, 7 kundër dhe 4 abstenim nga 88 deputetë të pranishmë në Kuvend.
Deputetët e opozitës së re kanë votuar kundër këtij vendimi përveç Aurora Marës nga radhët e LSI, e cila bashkoi votën me mazhorancën.
Siç njoftoi dje Damian Gjiknuri, i propozuar në krye të Komisionit për Reformën Zgjedhore, mazhoranca e pret Partinë Demokratike për të kryer reformën zgjedhore, deri në 5 maj.
Më herët, deputetja Rudina Hajdari kërkoi që opozita e re të jetë pjesëmarrëse në procesin për reformën zgjedhore, duke e quajtur të turpshme ftesën e Partisë Socialiste për të pritur deri më 5 maj Partinë Demokratike jashtë parlamentare për të dhënë sugjerimet e saj për reformën.
Ajo tha se opozita e re duhet të shfaqë idetë e saj për sistemin e ri zgjedhor. Përgjigjet kryeministri Edi Rama, duke sqaruar se opozitën e vjetër e pret vetëm për këtë pikë, duke qenë se reforma ka nisur me PD-në e vjetër.
Megjithatë, kreu i qeverisë tha se nuk mund të presë PD-në pas 5 majit, dhe nëse Komisioni Evropian e sheh reformën si kyçe për raportin e progresit të qershorit për çeljen e negociatave, atëherë Kodi i ri zgjedhor do të miratohet pa PD-në e vjetër, me votat e opozitës së re, vetëm sipas rekomandimeve të OSBE/ODIHR dhe asnjë sugjerimi të jashtëm.
“Me opozitën e re, miratojmë gjithçka tjetër. Me PD-në na lidh vetëm reforma zgjedhore”, theksoi Rama.
/a.rada
