Në prag të sezonit veror, kur qytetet bregdetare përballen me fluks të lartë turistësh dhe rritje të aktiviteteve tregtare, autoritetet kërkojnë shtim të kontrolleve dhe më shumë prezencë në terren.Për këtë qëllim, Kryeinspektori i Përgjithshëm Dashnor Sula zhvilloi në Vlorë një mbledhje me drejtuesit dhe operatorët e inspektoriateve rajonale, ku u diskutuan problematikat kryesore dhe koordinimi i institucioneve përqëndruan në sektorë si shëndetësia, siguria ushqimore, territori dhe mjedisi.
“Të jeni të sigurtë që çdo subjekt sot në Republikën e Shqipërisë do t’i nënshtrohet çdo kontrolli dhe kategorizimi që do të thotë është i pamundur dhe tolerance është zero për arsye sepse kërkohet pra nga kapitulli i 12-të i negociatave të Bashkimit Europian”, tha Sula.
Kryeinspektori foli edhe për ndryshimet në strukturën e inspektoriateve, ku përfshihet krijimi i një strukture të posaçme dhe bashkimi i IKMT me IMT. Ai theksoi gjithashtu se qytetarët do të kenë më shumë mundësi për të denoncuar shkeljet përmes portalit online dhe linjës telefonike të dedikuar.
“Që të gjithë të jetë një strukturë kompakte, unike pikërisht për të bërë të mundur lëvizjen në terren dhe monitorimin në terren në çdo çaste”, u shpreh Sula.
Kryeinspektori pranoi se ndërtimet pa leje mbeten një problem i vazhdueshëm për zonat bregdetare, duke përmendur edhe rastet e evidentuara në Sarandë, ndërsa paralajmëroi kontrolle më të forta gjatë gjithë sezonit veror.
