Kreu i Partisë Demokratike Lulzim Basha ka përcjellë ngushëllimet për ndarjen nga jeta të artistit të madh, Sherif Merdani.
Në një postim në rrjetet sociale, Basha shprehet se zëri i tij kumboi fort dhe në errësirën e regjimit dhe të burgjeve të komunizmit.
“Me trishtim mësova lajmin e ndarjes nga jeta të artistit të njohur Sherif Merdani. Sherifi ishte një nga artistët më të spikatur të brezit të tij. Zëri dhe arti i tij kumboi fort dhe në errësirën e regjimit dhe të burgjeve të komunizmit në të cilat ai kaloi 16 vite të jetës. I shpreh ngushëllimet më të thella familjes, të afërmve, miqve dhe të gjithë komunitetit të artistëve shqiptarë që sot humbën të afërmin dhe mikun e tyre! Shpirti i tij u prehtë ne paqe!” shkruan Basha.
Këngëtari i shquar u nda nga jeta ditën e sotme në moshën 81-vjeçare. Ikja e tij është një humbje e madhe për botën e artit shqiptar.
Merdani njihet si një ndër këngëtarët më të mëdhenj të muzikës së lehtë shqiptare. Pas Festivalit të 11-të ai, ai edhe disa kolegë të tij, u përndoq nga regjimi i Enver Hoxhës dhe përfundoi në burg, ku u dënua me 16 vite. Pas viteve ’90 Merdani ka punuar edhe si diplomat në ambasadën shqiptare në Romë.
/b.h
