Presidenti ukrainas Volodymyr Zelensky i bëri thirrje sot bashkësisë ndërkombëtare të veprojë, pas një jave me më shumë se 4 mijë sulme ajrore ruse ndaj Ukrainës.
“Moska i lejon vetes të përshkallëzojë sulmet e saj, duke përfituar qartë nga fakti që bota është e përqendruar në sigurimin e paqes në Lindjen e Mesme,” shkroi Zelensky në një mesazh në platformën e rrjeteve sociale X.
Presidenti ukrainas theksoi se nuk duhet të ketë lehtësim të presionit ndaj Rusisë:
“Pikërisht për këtë arsye, nuk duhet të lejohet asnjë lehtësim i presionit. Sanksionet, tarifat dhe veprimet e përbashkëta kundër blerësve të naftës ruse, atyre që financojnë këtë luftë, të gjitha duhet të mbeten në tryezë,” shtoi ai.
Sipas Zelenskyt, kjo qasje mund të hapë rrugën për një paqe të qëndrueshme në Evropë:
“Bota mund ta garantojë këtë paralelisht me procesin e paqes në Lindjen e Mesme,” theksoi udhëheqësi ukrainas.
Ukraina prej kohësh ka kërkuar vendosjen e sanksioneve më të ashpra, përfshirë kundër Kinës dhe Indisë, të cilat janë ndër blerësit më të mëdhenj të naftës ruse.
Zelensky deklaroi gjithashtu se Rusia ka intensifikuar terrorizmin ajror ndaj qyteteve dhe komuniteteve ukrainase, duke rritur ndjeshëm sulmet mbi infrastrukturën energjetike të vendit.
“Vetëm gjatë javës së kaluar, Rusia ka përdorur më shumë se 3,100 dronë, 92 raketa dhe rreth 1,360 raketa lundrimi kundër Ukrainës. Dje, në Kostyantynivka, një fëmijë u vra në një kishë nga një raketë lundrimi,” shkroi presidenti ukrainas.
Sipas autoriteteve, të paktën katër persona kanë humbur jetën në rajonin e Donetskut – dy në Kostyantynivka dhe dy të tjerë në rajonin e Khersonit.
Ndërkohë, Forcat Ajrore Ukrainase raportuan se sot janë regjistruar mbi 100 sulme të reja me dronë rusë, nga të cilat pothuajse të gjitha janë zmbrapsur.
