Presidenti ukrainas, Volodymyr Zelensky, deklaroi në Beograd se politika e Ukrainës ndaj pavarësisë së Kosovës mbetet e pandryshuar.
Gjatë një konference të përbashkët për media me presidentin serb, Aleksandar Vuçiç, Zelensky theksoi se Ukraina respekton integritetin territorial të partnerëve të saj dhe të drejtën ndërkombëtare.
“Sa i përket Kosovës, qëndrimi ynë mbetet i pandryshuar”, deklaroi Zelensky, duke shprehur njëkohësisht mirënjohjen ndaj Serbisë për respektimin e integritetit territorial të Ukrainës, përfshirë Krimenë.
Ukraina nuk e njeh pavarësinë e Kosovës, e shpallur në vitin 2008. Pavarësisht këtij qëndrimi, Kosova i është bashkuar sanksioneve të Bashkimit Evropian dhe Shteteve të Bashkuara kundër Rusisë pas nisjes së pushtimit të Ukrainës në shkurt të vitit 2022. Prishtina ka strehuar gjithashtu gazetarë ukrainas të larguar nga vendi për shkak të luftës.
Nga ana tjetër, Vuçiç tha se gjatë takimit me Zelenskyn kanë diskutuar edhe për bashkëpunimin ushtarak.
“Çfarë do të ndodhë kur të përfundojë lufta, kjo është çështje tjetër”, tha Vuçiç, duke e cilësuar vizitën e Zelenskyt në Serbi si të rëndësishme.
Presidenti serb njoftoi gjithashtu se në Serbi pritet të hapet, në mesin e shtatorit, një fabrikë për prodhimin e dronëve, në bashkëpunim me kompani izraelite. Ai vlerësoi ndërkohë përvojën e Ukrainës në këtë fushë, duke theksuar se ukrainasit kanë zhvilluar një industri të avancuar të prodhimit të dronëve.
