Presidenti ukrainas Volodymyr Zelensky ka zhvilluar një vizitë zyrtare në Serbi, ku është pritur nga presidenti Aleksandar Vuçiç në pallatin presidencial.
Takimi mes dy liderëve zhvillohet pas një tjetër nate me sulme të fuqishme ruse në Kiev dhe zonat përreth. Sipas autoriteteve ukrainase, të paktën katër persona kanë humbur jetën.
Zelensky dhe Vuçiç zhvilluan fillimisht një takim ‘kokë më kokë’, ndërsa më pas pritet të dalin në konferencë për shtyp. Gjatë bisedimeve, pritet të diskutohen marrëdhëniet ekonomike mes dy vendeve, raportet me Bashkimin Evropian dhe çështjet e sigurisë.
Serbia ka marrëdhënie të afërta me Rusinë dhe presidenti Vuçiç ka refuzuar të vendosë sanksione ndaj Moskës. Ky qëndrim ka shkaktuar kritika nga Bashkimi Europian dhe ka ndikuar në procesin e anëtarësimit të Serbisë në BE.
Megjithatë, Serbia ka ofruar ndihmë jo ushtarake për Ukrainën. Ndërkohë, Rusia ka akuzuar kompani serbe se kanë shitur municione Ukrainës, pretendim që Vuçiç e ka mohuar.
Sulmet ruse në Kiev
Vizita e Zelenskyt në Serbi vjen në një kohë kur Rusia ka intensifikuar sulmet me raketa dhe dronë ndaj Ukrainës.
Sipas Zelensky-t, një sulm me dron në Pukhivka, në rajonin e Kievit, vrau tre persona, mes tyre edhe një fëmijë 3-vjeçar. Viktimat ishin gjyshi, gjyshja dhe nipi i tyre.
Katër persona të tjerë u plagosën dhe u dërguan në spital. Mes tyre ishin prindërit e fëmijës, vëllai i tij 15-vjeçar dhe një fqinj që kishte shkuar për të ndihmuar familjen.
Një tjetër person humbi jetën në Kiev pas një sulmi me gjashtë raketa balistike ndaj infrastrukturës civile.
Zelensky i bëri thirrje komunitetit ndërkombëtar të shtojë presionin ndaj Rusisë dhe të vendosë sanksione të reja për të penguar prodhimin e raketave balistike.
