“Nëse nuk e kupton kaq gjë, është një shenjë se je budallaqe ose po kërkon hapur të gënjesh publikun”.
Me këtë fjalor i është drejtuar zëdhënësja e shtypit e Ministrisë së Jashtme ruse, Maria Zakharova, kryediplomates gjermane Annalena Baerbock, mbi çështjen e rritjes së çmimeve në botë, ku nga ana e Moskës mohohet se janë ata shkaktarët e një krize të dukshme botërore.
Më parë, ministrja e Jashtme gjermane, Baerbock, pati deklaruar se Rusia është përgjegjëse direkte për situatën e krijuar pas agresionit rus në Ukrainë.
Por, për Zakharovën, faji është i gjithkujt, veçse i Kremlinit jo.
Ajo ka pretenduar edhe se dështimi i shtetit të Ukrainës, për shkak të angazhimit të Perëndimit në procesin e shtetformimit, është parësisht për t’u fajësuar mbi krizën.
Retorika e zëdhënëses ruse ka marrë më pas edhe përmasa personale, kur ka shkruar se “nëse Baerbock nuk e kupton këtë gjë, ose është budallaqe, ose po kërkon të gënjejë e manipulojë opinionin publik”.
Kritikat nuk i ka kursyer as për paraardhësit e ministres aktuale gjermane, mbi të cilët ka thënë se “kanë interferuar në politikbërjen e Ukrainës”.
Fakti është se Ukraina mbetet një ndër shtetet me prodhimin më të lartë të grurit dhe mungesa e furnizimeve me drithëra nga aty për shkak të luftës që po zhvillohet, ka krijuar dhe vijon të krijojë problematika të shumta në tregun botëror, pergatiti Tema.
