Pas acarimeve dhe akuzave ndaj qeverisë nga ana e ministrave të Ilir Metës, ky i fundit është përpjekur t’i zbusë tonet e ashpra brenda koalicionit.
Në një takim me anëtarët e Njësisë Nr.5 në Tiranë. Ilir Meta ka folur për herë të parë pas debateve të fundit në koalicionin qeverisës duke deklaruar se vizioni i LSI-së është zgjidhja institucionale dhe jo retorikat klonfliktuale politike.
“Zgjidhja institucionale me përgjegjshmëri të plotë dhe jo retorikat konfliktuale politike, fajësuese dhe shfajësuese, do ta çojnë angazhimin tonë për forcimin e shtetit ligjor dhe sundimit të ligjit në vend në nivele të reja, shumë më të larta dhe të qëndrueshme. Ky është vizioni dhe kjo është përgjegjshmëria e Lëvizjes Socialiste për Integrim”, – mësohet të ketë thënë Meta.
Pak ditë më parë, ministri Lefter Koka hodhi akuza të rënda për përfshirjen e policisë së Durrësit në trafik droge dhe aktivitete politike. Deklaratat e Kokës u përcollën me indiferencë nga Edi Rama, ç’ka duket se ka bërë që Meta të mos i përkrahë së paku publikisht fjalët e ministrit të tij.
Kjo nuk është hera e parë që LSI provokon përmes “mendimeve personale” marrëdhënien brenda koalicionit. Ndërkohë, partia e Metës ende nuk ka një përgjigje përfundimtarepër vijimin e marrëveshjes me PS në zgjedhjet 2017 e në vijim.
