Zbulohet vendodhja e ish-shefit të Antidrogës së Fierit Dritan Zagani i shpallur në kërkim nga policia për shpërdorim detyre. Burime për Vizion Plus, bëjnë të ditur se ai i është bashkuar bashkëshortes dhe tre vajzave në Zvicër.
Deri më tani nuk konfirmohet ende nëse Zagani dhe familja e tij kanë bërë kërkesë për azil në Zvicër, apo edhe mënyra që Zagani ka mundur të largohet nga Shqipëria. Ai ndodhej nën masën “arrest shtëpie”.
Sipas policisë, nga verifikimet e kryera, rezulton se ai nuk ka kaluar nëpërmjet kufirit, pasi nuk figuron sistemin TIMS.
Në këtë mënyrë policia dyshon se ish-shefi i antidrogës ka përdorur dokumente te falsifikuara ose edhe ndonjë mënyrë tjetër për të kaluar ilegalisht kufirin.
Ndërkohe Prokuroria e Fierit, ka ngritur ndaj tij edhe akuzën e largimit nga vendi i vuajtjes se dënimit.
Gjatë qëndrimit në masën e arrestit në shtëpi për akuzën e shpërdorimit te detyrës, Zagani nuk ka qenë në asnjë moment nën mbikëqyrjen e policisë. Kjo i ka dhënë atij mundësi që të largohet pa u vënë re nga askush.
Gjykimi ndaj Zaganit nisi disa muaj më parë pasi u transferua nga Gjykata e Krimeve të Rënda drejt Gjykatës së Fierit.
Procesi është ne fazën e paraqitjes se provave shkresore me dëshmitë e personave që kanë dijeni për dekonspirimin e operacioneve antidrogë të policisë.
Vete i akuzuari kishte kërkuar ndryshimin e masës ne detyrim paraqitje, kërkese kjo qe i ishte refuzuar.
Zagani dyshohet se ishte rekrutuar dhe jepte informacione për trafikun e drogës tek policia italiane e Guardia di Financa.
Për këto informacione në një rast ai edhe është shpërblyer me një shumë parash, e cila është dërguar nëpërmjet agjencisë së transfertave të parave.
