Mediat pranë Lulzim Bashës, e kanë cilësuar si rastësore një foto të Bashës me trafikantin e drogës Arben Xibri.
Por, në fakt, nuk është vetëm një foto dhe një takim që Basha ka mbajtur me Xibrin.
TemA ka publikuar foto që tregojnë se ai është takuar të paktën dy herë me Xibrin.
Foto këto që gjenden edhe në faqen zyrtare të Lulzim Bashës.
PD ndërkohë ka reaguar pas publikimit të fotove, duke thënë se Saimir Tahiri po bën akuza ordinere ndaj Lulzim Bashës.
Ajo madje kalon në akuza ndaj ministrit të Brendshëm, duke thënë se është pikërisht ky i fundit ai që e ka akuzuar kryeprokurorin Adriatik Llalla.
“Do të donim shumë që ky trafikanti të ishte në prangat e policisë duke dhënë sqarime edhe për aludimet miqësore të ministrit Tahiri. Por siç ka ndodhur deri tani çuditërisht trafikantet i shpëtojnë policisë. Flagrant është rasti i baronit të drogës Balilajt që shëtit i lirë dhe nën mbrojtjen e Tahirit në Sarandë. Nuk mund të fshihesh pas aludimesh dhe akuzash kaq ordinerë ti që je përgjegjësi kryesor i kthimit të vendit në hambar drogë dhe njeriu qe u jep mbrojtje të drejtpërdrejtë trafikanteve të drogës, gjobëvënësve dhe kriminelëve”, thuhet në reagimin e PD-së.
“Sot në fakt po prisnim reagim tënd ose të kryeministrit për kërcënimin që i është bërë Prokurorit të Përgjithshëm. Thuhet se kërcënuesit janë miqtë e tu. Urojmë dhe shpresojmë që institucionet përgjegjëse ta zbardhin sa më parë këtë ngjarje të denjë për vendet ku sundon mafia dhe krimi. Në rast se mendoni se me shpifje do ti mbyllni gojën opozitës, jeni të dështuar. Beteja totale kundër krimit, drogës dhe lidhjeve tuaja dhe të Edi Ramës me kartelin, sapo ka nisur”, vijon njoftimi./a.m.
