Gjykata në Tiranë caktoi masën e sigurisë “arrest me burg” për shqiptarin nga Maqedonia, Imerli Avmeti, që dyshohet se ka qenë pjesë e formacioneve të ISIS-it.
I dyshuari 46-vjeçar, me banim në Gostivar, kishte hyrë ilegalisht në Shqipëri, por ishte mbajtur në vëzhgim nga ana e strukturave të Antiterrorit. Sipas dosjes së përcjellë nga pala maqedonase, dyshohet se Imerli Avmeti ka stërvitur dhe trajnuar individë me tendencë ekstremiste, të cilët, pas fazës përgatitore, u janë bashkuar formacioneve të ISIS-it.
Me kërkesë të Prokurorisë, i arrestuari u la në qeli ditën e djeshme, në mënyrë që Prokuroria të ketë kohën e nevojshme për formalizimin e ekstradimit të tij në Maqedoni.
Më 13 gusht 2016, Gjykata maqedonase lëshoi urdhër-arrestin, ndërsa forcat e Antiterrorit në Tiranë një ditë më pas e ekzekutuan urdhrin e Gjykatës maqedonase, pasi po mbanin në vëzhgim të dyshuarin.
Zyrtarisht, Policia e Shtetit deklaroi se arrestimi i 46-vjeçarit u bë pas një urdhër-arresti ndërkombëtar të lëshuar nga Prokuroria maqedonase.
PERSONAZHI
Imerli Avmeti ka 4-5 hyrje- dalje në Shqipëri, disa prej të cilave i ka legale, pasi janë të regjistruara edhe në sistemin TIMS. Së fundi, ai ka hyrë në vendin tonë ilegalisht, pasi dyshohet se kishte marrë dijeni për faktin se ishte në ndjekje nga Policia. Identifikimi dhe arrestimi i të kërkuarit është bërë në bazë të informacioneve të marra nga shërbimet sekrete të dy vendeve.
Në Shqipëri dyshohet se 46- vjeçari ka nisur të kontaktojë me persona me prirje radikale, të cilët dyshohet se ka tentuar t’i rekrutojë për t’i dërguar në kampet stërvitore jashtë Shqipërisë, me destinacion final Sirinë. Policia shqiptare ka thënë se 46-vjeçari akuzohet në vendin e tij për veprën penale “Pjesëmarrje në ushtri, polici, formacione paramilitare të huaja”, parashikuar nga neni 322 i Kodit Penal maqedonas.
SI U ARRESTUA
Në deklaratën e Policisë theksohet se kapja e të dyshuarit është bërë pas një pune disajavore me përdorimin e metodave speciale të hetimit nga specialistët e Drejtorisë së Antiterrorit. Kanë qenë këta të fundit që kanë bërë lokalizimin e vendndodhjes së personit të shumëkërkuar në vendin e quajtur “Rruga e Barrikadave”, pranë ish-kinema “17 Nëntori”, Tiranë.
“Ky shtetas ka mundur t’u shpëtojë arrestimeve të kryera në Maqedoni në muajin gusht 2015 gjatë një operacioni antiterrorizëm. Nëse gjendet fajtor, rrezikon burgim nga 20 vite deri në burgim të përjetshëm. Operacioni antiterror për kapjen dhe arrestimin e shumë të kërkuarit për akte terroriste është koordinuar dhe zhvilluar në bashkëpunim të suksesshëm me partnerët tanë strategjikë ndërkombëtarë”, theksohej ndër të tjera në materialin e akuzës ndaj 46-vjeçarit./panorama/a.k
