Arta Marku do të jetë Kryeprokurore deri në muajin Prill të vitit 2018, kur pritet të zgjidhet prokurori i ri me mandat të plotë. Për herë të parë u dha një sqarim lidhur me kohën kur Kryeprokurorja e Përkohshme do të qëndrojë në detyrë. Kreu u Grupit të PS Taulant Balla tha se Kryeprokurori i ri do të zgjidhet në Mars deri në Prill të 2018-ës.
“Sipas ligjit u bë procedura, në kushtet që KLP nuk ishte krijuar. Shqetësimi që ngre Spaho është pse nuk prit krijimi i KLP. Në vlerësimin tim përzgjedhja e anëtarit të 11-të të KLP-së përfundon në shkurt. Në mars ngrihet KLP-ja. Kryeprokurori i ri me mandat 7-vjeçar në vlerësimin tim zgjidhet në fund të muajit mars-fillim të muajit Prill të vitit të ardhshëm”, deklaroi Balla.
Më tej Taulant Balla sfumoi akuzat se zonja Marku është përzgjedhur për të mbyllur dosjet e nxehta, si ajo ndaj ish-ministrit Tahiri.
“Kryeprokurorja e re, me reformën e re nuk mundet që t’i heqë dosjet Prokurorëve, apo t’i transferojë ata. Prokurori i rrethit mund të lëvizë vetëm me vendim gjykate”, deklaroi Balla.
Gjatë emisionit Top Story kreu i grupit parlamentar të PD, Edmond Spaho ringriti shqetësimin se përse nuk prit krijimi i KLP-së, aq më pak pasi ditët e fundit i propozuan 3 emrat për anëtarë të saj nga Shoqëria Civile.
“Në Shqipëri pretendohet se sistemi juridik është korruptuar deri në qelizë dhe së dyti është kapur nga politika. Pra synimi është heqja e korrupsionit në drejtësi fillimisht, e më as korrupsionit në politikë. Së dyti të gjithë këtë mekanizëm të drejtësisë të mos e emërojë politika. PD është akuzuar se ka frikë nga reforma dhe dëshiron të ruaj njerëzit që ka vendosur vetë. Në fakt ne kemi punuar dhe kemi votuar Kushtetutën në mënyrën që sistemi i drejtësisë të bëjë vetting dhe politika të mos ketë më punë në zgjedhjet e këtyre institucioneve. I pari që zgjidhet është KLP, ku është vettingu, ra në mënyrën më banale. I 11-dhjeti nuk zgjidhet me qëllim. Nuk duan ta zgjedhin KPL. Anëtarët e Shoqërisë Civile nuk donin ta zgjidhnin. Janë sjellë tani 3 kandidatët e tyre, lind pyetja se pse u procedua me zgjedhjen e Kryeprokurorit”, u shpreh Spaho.
/a.m.
