Një tjetër rrjet prostitucioni është goditur nga Policia e Durrësit, ndërsa në hetim janë vënë dy tutoret kineze. Pas një hetimi dy javor, blutë e qytetit bregdetar të Durrësit kanë arritur që të zbulojnë një banesë që merrej me qira nga dy kinezet për ushtrimin e prostitucionit. Ndaj tyre rëndojnë dy vepra penale, “Prostitucioni”, dhe “Shfrytëzimi i prostitucionit”.
Po ashtu, në hetim janë vënë edhe 6 meshkuj nga Durrësit dhe Kruja, të cilët janë gjetur brenda në banesë në momentin e ndërhyrjes nga policia.
“Specialistët e Sektorit për Hetimin e Trafiqeve të Paligjshme të Drejtorisë Vendore të Policisë Durrës, pas një hetimi 2-javor me metoda proaktive, për veprat penale “Shfrytëzimi i prostitucionit”, “Prostitucioni” dhe “Trafikimi i personave të rritur”, finalizoi operacionin policor të koduar “Storm 3”, në kuadër të të cilit nisi procedimi penal për veprat penale “Prostitucioni”, dhe “Shfrytëzimi i prostitucionit” për shtetaset kineze R. W, 54 vjeçe, X. X., 41 vjeçe. Gjithashtu u proceduan penalisht dhe 6 shtetas nga Durrësi dhe Kruja që u gjetën në banesën e dy shtetasve kineze”, informoi Policia e Durrësit.
Hetimet dyjavore kanë zbuluar se kemi të bëjmë me një grup të strukturuar kriminal, që drejtohet nga Kina. Policia e Durrësit informonin se anëtarët e grupit, të gjithë kinezë, dyshohet se rekrutojnë vajza nga Kina dhe më pas i sjellin në vendin tonë për kryerjen e aktivitetit kriminal të prostitucionit. Skema është e njëjtë, grupi kriminal përdor faqe online ku “reklamojnë” vajzat dhe pasi sigurojnë klientët, i dërgojnë ata tek ambientet e marra me qira për të ushtruar prostitucionin.
“Po nga hetimet ka rezultuar gjithashtu se një grup i strukturuar kriminal në përbërjen e të cilit janë shtetas kinezë, rekrutojnë shtetase kineze në Kinë dhe më pas i dërgojnë në drejtim të Shqipërisë për kryerjen e aktivitetit kriminal të prostitucionit, ku u sigurojnë apartamente me qira për kryerjen e aktivitetit kriminal dhe pasi sigurojnë klientët nëpërmjet faqeve online i dërgojnë klientit vendndodhjen. Blutë e Durrësit thonë se po punohet për identifikimin dhe arrestimin e anëtarëve të grupit kriminal”, njoftoi policia.
Në kuadër të operacionit, “Storm 3″ u sekuestruan dy pasaporta të shtetaseve kineze, 86400 lekë, 440 euro dhe 3 aparate celular, disa karta telefoni dhe disa karta banke.
