Miron Çako, drejtues i zyrës së Katekizmit në KOASH, i ftuar në rubrikën “Opinion” në News24, ka folur në lidhje me figurën e Kryepeshkopit Anastas Janullatos i cili u nda sot nga jeta.
Çako ka rrëfyer një episod të veçantë, ku Kryepeshkopi Anastas kishte ofruar drejtimin e Kishës Ortodokse Priftit Artur Lionili, i cili shërbente në Kishën e ndërtuar nga Fan Noli.
Sipas tij, Anastas i kishte thënë Lionilit: “Hajde merre Kishën ti, meqë je edhe nga Kisha e ndërtuar nga Fan Noli.” Por Lionili nuk e kishte pranuar, pasi ishte i martuar dhe për këtë arsye nuk mund të merrte një post të tillë.
Çako theksoi se Kryepeshkopi Anastas nuk e kishte kërkuar vetë të bëhej Kryepeshkop Kanonik i Shqipërisë. Në kujtimet e tij, Anastas kishte shkruar se kishte planifikuar të largohej, por ishte vendosur në krye të Kishës pas kërkesës së komunitetit të krishterë ortodoks në Shqipëri.
“E kërkuan vetë të krishterët ortodoksë që kishin mbetur në Shqipëri. Vajtën në Patriarkat dhe kërkuan që Anasatasi të vendosej Kryepeshkop Kanonik i Shqipërisë,” tha Çako.
