Arkeologët kanë gjetur 17 mumje në katakombe të zbuluara në provincën Minya, në qendër të Egjiptit, njoftuan sot autoritetet gjatë një konference shtypi.
“Kemi zbuluar katakombe, që përmbanin një numër të konsiderueshëm mumjesh”, tha Salah al-Khouli, në krye të ekipit të arkeologëve egjiptianë përgjegjës për këtë zbulim.
Konferenca e shtypit do të mbahet në rajonin shkretëtirë në Touna-el-Gabal, rreth 200 kilometra në jug të Kajros, ku u krye zbulimi.
”Në zonën e zbulimit u gjetën 17 mumje dhe një numër i konsiderueshëm arkivolesh guri”, saktësoi Ministria e Antikitetit në një deklaratë të publikuar në media, duke bërë të ditur se dy arkivole guri ishin skalitur në argjil, ndërsa të tjerët në gur.
“Është varreza e parë njerëzore që zbulohet më qendër të Egjiptit me një numër kaq të madh mumjesh”, theksoi Khouli.
“Është një zbulim i rëndësishëm, i paprecedentë”, deklaroi për median, Mohamed Hamza, drejtor i departamentit të gërmimeve arkeologjike në Universitetin e Kajros./
