Euronews Albania ka intervistuar “spiunët” rusë që hynë në uzinën e Gramshit.
Spiunët rusë kanë treguar në një bisedë për “Euronews Albania” se ka qenë shumë e lehtë hyrja në uzinë ushtarake në Gramsh, duke theksuar se filmimi është diçka që e bënin në çdo vend që vizitonin dhe s’kishin lidhje me spiunazhin.
Për më tepër, siç ata treguan, në atë gjendje që ishte uzina e Gramshit nuk do të kishte asnjë interes për t’u përdorur për spiunazh.
“Mikhail organizoi çdo gjë. Më lajmëroi që do të lajmëronte dhe një shok të tij nga Ukraina, i cili është djali që ka makinën sportive portokalli. Nuk e dija që e kishte këtë makinë në fakt dhe kam ngelur e çuditur kur e kam parë, por tashmë kisha ardhur në Shqipëri dhe ishte tepër vonë të refuzoja këtë udhëtim.
Ne hymë brenda nëpër rrënojat e komunizmit dhe në Gramsh fotografuam për orë të tëra mjete të vjetra, pjesë armësh dhe gjëra të tjera. Hymë nga mbrapa uzinës, ishte shumë e lehtë për t’u futur dhe fotografuam gjithçka pamë, siç bëjmë përherë,” – u shpreh Timofoeva.
Në 20 gusht të vitit te kaluar, ngjarja që do të kthente sytë drejt fshatit Çekin të Gramshit do të ishte hyrja pa leje në uzinën e cila ka shërbyer për demontimin e armëve dhe sulmi që njeri nga ruset kreu ndaj ushtarëve shqiptarë, duke u cilësuar si sulm rus ndaj NATO.
Rusët Svetlana Timofoeva, Mikhail Zorin dhe ukrainasi Fedir Alpatov do të arrestoheshin, për t’u përballur në akuzat nga prokuroria e Elbasanit për “goditje për shkak të detyrës”, “dhënia e informatave sekrete”, dhe “sigurimi i informatave” kryer në bashkëpunim./m.j
