Prej muajsh vazhdon një betejë ligjore e udhëhequr nga Bashkia e Tiranës për të mos lejuar ndërtimin e 5 pallatave 17 katëshe buzë Digës së Liqenit. Teksa e gjithe vëmendja publike ishte fokusuar te debatet për reformën, kryetari i Gjykatës Administrative të Apelit, Kastriot Selita shfrytëzoi mundësinë dhe u bashkua me trupën gjykuese të kushërinjve e aksionerëve të kompanisë së ndërtimit që gjykojnë çështjen.
Trupa e re me relator Selitën hoqi pezullimin e IKMT. Masa, edhe pse ky nuk është gjyqi për lejen e ndërtimit, shkaktoi një entuziazëm të pashpjegueshëm te PD e mediat rreth saj – i njëjti grupim që nuk donte këndin e lodrave te Liqeni, por është dakord me pallatet te Diga.
Por, pa kaluar java, Bashkia kërkoi që të pezullohej vendimi i padrejtë i Selitës nga Gjykata e Lartë. Sot është zbardhur vendimi i cili i jep të drejtë bashkisë, duke pezulluar vendimin e Kastriot Selitës, Enkelejda Metalisë (kushërira) dhe Arjan Qafës (ortaku). Edhe pse beteja vazhdon, duket se disa segmente të gjyqesorit po reagojnë më pranë të drejtës qytetare e interesit publik, sesa me parë.
Kastriot Selita u propozua nga Bujar Nishani si Kryetar i Gjykatës Administrative të Apelit, ndërkohë që bashkëshortja e tij, Moza Kalia, është Drejtoreshë e Tatimeve VIP, ku edhe gjenerohen shumë çështje për gjykatën administrative. Raste të tilla janë pikerisht ato që vettingu do të frenojë për konflikt interesi, deklarim të ardhurash e procese jo-konkurruese emërimi.
(java / r.a)
