Policia greke ka zbardhur vrasjen e 38-vjeçares britanike Elizabeth Ross, trupi i së cilës u gjet brenda një valixheje në një godinë të braktisur në zonën e Kypselit, në Athinë. Në lidhje me ngjarjen është arrestuar një 26-vjeçar afgan, ndaj të cilit është ngritur akuzë për vrasje me dashje, grabitje dhe shkelje të ligjit për armët.
Sipas hetuesve, i dyshuari ka deklaruar gjatë marrjes në pyetje se kishte gjetur gruan të vdekur dhe, “për të mos u përfshirë”, vendosi trupin e saj në valixhe. Ai dyshohet se më pas ka përdorur kartat bankare të viktimës dhe ka kryer tërheqje parash në vlerën rreth 10 mijë euro.
Gjatë kontrollit në banesën e tij, autoritetet gjetën dhe sekuestruan një armë imitim (replikë pistolete) dhe një thikë.
Hetimet kanë zbuluar gjithashtu se i riu dyshohet se ka tentuar të krijojë një skenar të rremë për të çorientuar autoritetet.
Pas vrasjes, ai mbylli telefonin e viktimës dhe përdori një numër tjetër për të dërguar mesazhe personave të afërt të 38-vjeçares, bashkëshortes së tij, madje edhe vetes, duke pretenduar se ishte “xhihadist” dhe se e kishte vrarë gruan për arsye fetare.
Sipas hetuesve, qëllimi i këtyre mesazheve ishte që përgjegjësia të drejtohej te një person i panjohur dhe ngjarja të merrte një tjetër drejtim. Megjithatë, analiza e të dhënave telefonike, pamjeve të kamerave të sigurisë dhe dëshmive çoi autoritetet te 26-vjeçari.
Si arritën hetuesit te autori
Elizabeth Ross mbërriti në Greqi më 29 qershor nga Edinburgu. Ajo ishte e angazhuar prej vitesh në veprimtari vullnetare pranë kishave dhe organizatave humanitare në vende të ndryshme dhe përshkruhej nga të afërmit si një person i qetë dhe i përkushtuar.
Nga 2 korriku, ajo qëndronte në një apartament në Athinë, çelësat e të cilit i kishin i dyshuari dhe partnerja e tij. Kontakti i fundit i sigurt me viktimën është regjistruar më 15 korrik, rreth orës 21:41, kur ajo foli në telefon me një person të afërt.
Më pas, miqtë dhe të afërmit vunë re se mesazhet që vinin nga telefoni i saj kishin ndryshuar stil dhe mënyrë shkrimi, duke ngritur dyshime se pajisja po përdorej nga një person tjetër.
Më 19 korrik, telefoni i viktimës u aktivizua në zonën e Arahovës. Sipas analizës së të dhënave telefonike dhe pamjeve filmike, në të njëjtën zonë ndodheshin edhe i dyshuari, bashkëshortja dhe fëmija i tyre.
Një element i rëndësishëm për hetimin ishin edhe pamjet e kamerave të sigurisë. Mbrëmjen e 16 korrikut, i dyshuari është filmuar duke mbërritur me makinë pranë apartamentit dhe më pas duke u larguar me një valixhe të madhe.
Pak më vonë, rreth orës 22:43, ai është kapur nga kamerat duke lëvizur në këmbë, duke transportuar valixhen ku ndodhej trupi i viktimës, si dhe një qese blu. Rreth 13 minuta më pas, ai është larguar nga zona pa valixhen dhe pa qesen, duke mbajtur vetëm një çantë shpine.
Dyshimet e partneres së të arrestuarit
Një rol të rëndësishëm në hetim pati edhe dëshmia e bashkëshortes së të dyshuarit. Ajo deklaroi se filloi të dyshonte për përfshirjen e tij pasi më 30 korrik u bë identifikimi zyrtar i viktimës.
Ajo u largua nga banesa së bashku me foshnjën e saj dhe u vendos në hotel. Sipas dosjes hetimore, i dyshuari i kishte dhënë asaj 2 550 euro dhe, një ditë pas zhdukjes së britanikes, i kishte dhuruar edhe një telefon të ri iPhone 17 Pro. Gruaja i dorëzoi paratë dhe telefonin te autoritetet, duke dyshuar se ato ishin pasuri e viktimës.
Hetuesit vijojnë punën për zbardhjen e plotë të motivit dhe rrethanave të krimit, ndërsa 26-vjeçari pritet të përballet me drejtësinë.
