Autoritetet shqiptare kanë goditur një rast të trafikut të klandestinëve nga vendet e treta për në Shqipëri, më pas drejt Bashkimit Evropian.
Sipas policisë, një person është arrestuar ndërsa bashkëpunëtori i tij u shpall në kërkim. Po ashtu u proceduan penalisht, 7 shtetas të tjerë të huaj.
Nga hetimet e kryera ka rezultuar se dy persona, në bashkëpunim dhe me të tjerë nga Emiratet e Bashkuara Arabe, siguronin ftesa fiktive për persona të ndryshëm të huaj kryesisht nga vende si Siria, Egjypti dhe shtete të tjera nga Lindja e Mesme për të ardhur në Shqipëri me justifikimin për qëllime turistike. Më pas ju siguronin ndihmë për t’u larguar në menyrë të jashtëligjshme nga vendi jonë drejt vendeve të BE-së.
NJOFTIMI I POLICISË
Finalizohet operacioni i koduar “THE INVITATION”, për goditjen e veprimtarisë kriminale në fushën e dhënies ndihmë për kalim të paligjshëm të kufirit.
Operacioni i zhvilluar nga Seksioni për Hetimin e Trafiqeve të Paligjshme në DVP Tiranë, në bashkëpunim me Policinë Kufitare Rinas.
Vihet në pranga 1 shtetas dhe shpallet në kërkim bashkëpunëtori i tij. Si dhe procedohen penalisht 7 shtetas të tjerë të huaj.
Në zbatim të planit të masave për të parandaluar dhe goditur aktivitetin e paligjshëm të dhënies ndihmë shtetasve të huaj për kalim të paligjshëm të kufijve dhe tranzitimin e tyre në territorin shqiptar, me destinacion vendet e BE-së, specialistët për Hetimin e Trafiqeve të Paligjshme në DVP Tiranë në bashkëpunim me Komisariatin e Policisë Kufitare Rinas, bazuar dhe në informacionet e siguruara në rrugë operative, finalizuan me sukses operacionin e koduar “THE INVITATION”, në kuadër të të cilit u bë arrestimi i shtetasit:
H. L., 29 vjeç, banues në Durrës, për veprën penale “Ndihma për kalim të paligjshëm të kufijve” e kryer në bashkëpunim dhe u shpall në kërkim bashkëpunëtori i tij shtetasi sirian K. A., 40 vjeç, banues në Emiratet e Bashkuara Arabe.
Nga hetimet e kryera ka rezultuar se këta dy shtetas në bashkëpunim dhe me persona të tjerë nga Emiratet e Bashkuara Arabe, siguronin ftesa fiktive për persona të ndryshëm të huaj kryesisht nga vende si Siria, Egjypti dhe shtete të tjera nga Lindja e Mesme për të ardhur në Shqipëri me justifikimin për qëllime turistike, të cilët më pas ju siguronin ndihmë për t’u larguar në menyrë të jashtëligjshme nga vendi jonë drejt vendeve të BE-së.
Në vijim të veprimeve nga specialistët për Hetimin e Trafiqeve të Paligjshme në DVP Tiranë u proceduan penalisht dhe 7 shtetas të huaj, për veprën penale “ Kalimi i paligjshëm i kufirit”, konkretisht shtetasit :
A. A., 33 vjeç; A. A., 38 vjeç; B. B., 28 vjeç; A. A., 34 vjeç; A. A., 52 vjeç; A. I., 54 vjeç; A. M., 39 vjeç.
Vijon puna për identifikimin e personave të tjerë, të përfshirë në këtë veprimtari kriminale.
Materialet proceduriale i kaluan Prokurorise pranë Gjykatës së Shkallës së Parë Tiranë, për veprime të mëtejshme.
/b.h
