Një ditë pas deklaratës së bërë nga zyrtarja e lartë e Departamentit Amerikan të Shtetit, Victoria Nuland se SHBA i ka bërë një propozim të ri palëve për miratimin e Reformës në Drejtësi, Report Tv zbardh pjesë prej tij. Propozimi i ri lidhet me faktin se, ndërkombëtarët do të monitorojnë përzgjedhjen e gjyqtarëve dhe prokurorëve për Vetingun, ndërsa kanë të drejtë që të s’kualifikojnë kandidatura të mundshme.
Pra kandidatët për gjyqtarë dhe prokurorë që do të jenë pjese e 4 institucioneve të Vetingut, Këshillit të Lartë të Gjyqësorit (KLGJ) Këshillit të Lartë të Prokurorisë (KLP) Komisionit të Pavarur të Kualifikimit (KPK) dhe Kolegjit të Pavarur të Kualifikimit (KPK) mund të s’kualifikohen nga Përfaqësuesit e Operacionit Ndërkombëtar i Monitorimit.
Vlerësimi i anëtarëve të Vetingut sipas propozimit parashikohet që të bëhet nga 3 gjyqtarë të Gjykatës Kushtetuese të përzgjedhur me short nga Kryetari i Gjykatës Kushtetuese. Por përveç vlerësimit nga paneli i 3 gjyqtarëve, kandidatët për 4 institucionet e reja duhet të kalojnë edhe filtrin e fundit, që është Operacioni Ndërkombëtar i Monitorimit, që mund të rrëzojë kandidaturat.
Report Tv ka mësuar se është pranuar pjesërisht propozimi i PD për komisionin Ad-Hoc.
Ndërkohë, Kryetari i Partisë Demokratike Lulzim Basha do të mbledhë në orën 13:30 anëtarët e djathtë të Komisionit të Posaçëm të Reformës në Drejtësi, ku do iu sqarojë detajet e propozimit të ri të bërë nga zyrtarja e lartë amerikane. /a.k
