Pr.ligji “Për disa ndryshime dhe shtesa në ligjin nr.108/2013,“Për të huajt”, i dërguar së fundmi në Parlament, ka në fokus rregullimin e legjislacionit lidhur me punësimin e të huajve në vendin tonë.
Sipas drafit, rregullohet leja e punës për “Të transferuarit brenda ndërmarrjes”, sipas të cilës korporatat shumëkombëshe mund të lëvizin punëtorët e tyre të transferuar, me kualifikim të lartë.
Pr.ligji argumenton se janë krijuar lehtësira në lidhje me transferimet brenda korporatave, për kategoritë menaxherë, specialistë dhe praktikantë, duke krijuar kushte transparente dhe të harmonizuara të pranimit, qëndrimit dhe të punës.
“Për t’u kualifikuar për një lëvizje brenda korporatës, menaxherët dhe specialistët duhet të kenë punuar të paktën gjashtë muaj të pandërprerë për kompaninë shumëkombëshe, menjëherë para 4 transferimit të tyre (për punonjësit praktikantë kjo periudhë është 3 muaj pandërprerë). Leja e punës do të jetë e vlefshme për një maksimum prej 5 vjetësh në rastin e menaxherëve dhe specialistëve dhe 1 vit për praktikantët.”- sqarohet në relacion.
Pr.ligji specifikon edhe rregullat për të huajt që mund të ofrojnë shërbime në Shqipëri, të cilët pajisen me një leje pune për “shërbime kontraktuese”, për një periudhë totale jo më shumë se 1 vit.
Sipas relacionit të pr.ligjit në fjalë, “Hyrja e përkohshme dhe qëndrimi i profesionistëve të pavarur në shërbim të palës së interesuar, do të jetë për një periudhë totale, jo më shumë së dymbëdhjetë muaj, ose për kohëzgjatjen e kontratës, cilado qoftë ajo, përgjithmonë kur qëndrimi nuk e kalon periudhën dymbëdhjetë mujore.”
Qeveria sqaron në relacion se kjo nisme është marrë në kuadër të përafrimit të mëtejshëm të legjislacionit kombëtar me Direktivën 96/71/EC të Parlamentit Evropian, e cila rregullon qendrimin dhe punësimin e “ofruesve të shërbimeve me kontratë”, janë bërë ndryshime në strukturën, kriteret dhe kategoritë e nenit 102, neni 30 i projektligjit i cili përcakton lëshimin e lejes së punës për “shërbime kontraktuese”.
Pr.ligji “Për të huajt” bazuar në legjislacionin europian, rregullon edhe nocionin e “punonjësve stinorë”, aktivitetin që ushtrohet për profesione të rregulluara, të personit të huaj do t’i duhet të plotësojë kushtet e përcaktuara në përputhje me të drejtën kombëtare të ushtrimit të profesioneve të rregulluara. Nga ana tjetër, në lidhje me kategorinë “punonjës me kualifikim të lartë”, sidomos në lidhje me detyrimin e kontratës fillestare të punës, e cila është detyrim për pajisjen me këtë leje pune, kjo kontratë do të kërkohet vetëm për 1 vit për herë të parë.
